A zawna vawi li champion Verstappen

Formual 1 champion chu Max Verstappen a ni - Red Bull driver hian a zawna a vawi lina turin nomawi a chawi, tun season atan intlansiak pahnih la awm mah se midang tan umphak theih a ni tawh lo.

Nimin khan Las Vegas Grand Prix tlan a ni a, driver championship hmahruaitu Verstappen hi palinaah a thleng, a elpui leh amah hnaih bertu Lando Norris chu a hnung chiahah a thleng thung.

Kuminah intlansiak 22 an neih tawh aṭangin Verstappen hian point 403 a hmu a, pahnihna McLaren driver Norris hian point 340 a hmu thung, intlansiak pahnih an la hmabakah hian a tam berah point 60 hmuh theih a la ni, tuna an inthlauhna erawh point 63 a tling.

Tun season atan Qatar leh Abu Dhabi Grand Prix an la tlan dawn - Red Bull leh Verstappen tan chuan champion lawmna a ni tawh ang a, driver dang tan erawh anmahni tawka season ṭha taka khar theihna tura hun ṭha a la ni ve thung dawn a ni.

Vawi li champion

Formula 1 huangah hian driver tam tak an lo champion tawh ṭhin, vawi li champion thei erawh an tam lo - a zawna vawi li champion thei phei chu Verstappen leh Sebastian Vettel te chauh an ni, an sulhnu hi a nep lo hle.

Vettel hian Red Bull a chhuahsan hnuah a champion zui tawh lo, ani bakah hian Alain Prost chu vawi li a champion bawk. Max-a, Vettel leh Prost te chungah hian vawi nga champion Juan Manuel Fangio a awm, champion tam bik Lewis Hamilton leh Michael Schumacher (7 titles) an la awm bawk.

Kum 27 mi Verstappen chuan, "Season hmasa nena khaikhin chuan kumin chu a harsa hret, mahse kan tum ram chu kan thleng. Formula 1 champion vawi li nih hi ka suanghtuah phak ngai lo, mak tak maiin a tak chu a ni bawk si," a ti.

Red Bull an lawm

Season tir lamah Red Bull leh Max Verstappen te hi fal takin an kal a, midang tan elphak an ni lo. Mahse, season laihawlah buaina an nei, intlansiak pawn lam thlengin ṭawngkai mawi lo hriat tur a awm, chu chuan nghawng a nei bawk.

Awlsam taka champion thei tura ngaih Verstappen kha McLaren driver Lando Norris chuan a rawn chhaih buai phak deuh hman. Amaherawhchu, season tawp lamah Max a harhchhuak a, a hunah tak point hmu leh chat chatin a chungnung ta ber.

Red Bull team principal Christian Horner chuan, "Max Verstappen chu a zawnin vawi li a champion ta, hetiang a hlawhtlinna hi chu a ropuiin fak a phu takzet. Midang tana tih ve mai mai theih loh hun lawmawm chu kan tawng," tiin a sawi.