Jeje-a'n Chennaiyin a chhuahsan

Indian Super League chanchin sawi a nih chuan Mizo rilruah Jeje Lalpekhlua a lo lang nghal ṭhin a, Hnahthial tlangval hian September 8 tlai khan a club khelhna Chennaiyin a chhuahsan tur thu a sawi. 

Jeje chuan, "Indian Super League-a ka zinkawng bul min ṭansaktu in ni a, he club vang hian vawiin dinhmun hi ka thleng a ni," tiin Chennaiyin chu a thlah a, season tharah chuan club dang tan a inlan dawn. 

India international striker hi ISL club panga velin an dawr a, he thu buatsaih a nih lai hian eng club ber nge a zawm dawn a la chiang lo. Jeje chuan, "Rei lo teah kan chinfel tawh ka beisei," tiin Vanglaini a hrilh. 

Mizo Sniper hming lem an pek Jeje hi Chennaiyin pawh hian an hnena cham turin an sawm a, mahse chhuahsan a thlang ta zawk - Kerala Blasters, Jamshedpur FC, Hyderabad FC leh East Bengal te nen sawi zawm mek a ni. 

Chennaiyin neitu zinga mi, Bollywood star lar Abhishek Bachchan chuan, "Jeje kan lawm e. I hma hun atan duhsakna sang ber ka hlan che a, he club chhungkuaa mi hi i ni reng ang. Ka ngai dawn khawp mai che," tiin Jeje thlahna thu Twitter lamah a ziak.