England-in goal an khung thei lo

UEFA Nations League-ah England-in beisei an pha lo a, Thawhlehni zan khan Denmark nen goal awm loin an inhnehtawk. Inkhel dangah Belgium-in Iceland 5-1 in an sawp a, Roberto Martinez-a hote hian Denmark 2-0 a an hneh tawh bawk avangin an group-ah hmahruaitu an ni.

England hi khelmual pawn-ah tun hma aṭangin thawm an nei lian ṭhin. UEFA Nations League-ah pawh khelmual chhung ni loin khelmual pawnah chuan chanchin ngah ber tiha sawi theih an ni.

Squad an puan hnu lawkah Harry Maguire chu Greece thliarkara buaina a neih avangin squad aṭangin paih a ni a, Premier League star Jack Grealish koh a nih lawk loh avangin a chanchin an sawi nasa bawk.

Marcus Rashford leh Harry Winks te an inhnukdawk a, Grealish koh a ni thung. Gareth Southgate-a hote hian Iceland 1-0 in an hneh hram a, inkhelh banah erawh Phil Foden leh Mason Greenwood te chet dan chu an sawi zui ber a ni.

England rawlthar duhawm pahnih hi an thlenna hotel-a nula an tawm pui vangin thawn haw an ni a, English media pawhin Denmark nen an inkhel tur aiin Foden leh Greenwood te chanchin ziah nuam an ti zawk. 

England manager Gareth Southgate-a'n Wolves defender Conor Coady leh Leeds United midfielder Kalvin Phillips te bul a ṭantir a, ram tana an vawi khat khelhna ve ve a ni. Iceland laka hnawhchhuah Kyle Walker aiah Liverpool right back Trent Alexander-Arnold a lut bawk.

Kum 27 mi Coady hian ram tana a inlan hmasak berah inkiltawihna a nei lo a, Eric Dier leh Joe Gomez te kiangah goal venhim chauh ti loin team kaihhruaitu a ni a. Entu mipui an awm loh bawk avangin Coady-a'n a ṭhiante khelhdan tur a hrilh ri awrawl ring ṭha tak a hriat theih. Wolves defender hian a captain-na hnuaiah kum 2010 khan UEFA Euro U17 C'ship-ah England U17 a champion pui tawh a, a sulhnu thlirin a chet dan nen hian a inmil hle.

England midfield erawhin beisei an pha lo a, Premier League-a Leeds United hruai thlengtu Kalvin Phillips-a'n thil danglam vak a ti lo. Chutihrualin Leeds ṭantuten 'Yorkshire Pirlo' tiha an sawi midfielder hian Premier League a khelh hauh hmain ram tan a khel tih hriat a ṭha.

Aston Villa captain Jack Grealish pawhin Phillips thlakin a vawi khat nan ram tan a inlan a, Community Shield-a man of the match Ainsley Maitland-Niles pawhin Arnold thlakin England tan a khel ve ta bawk.

Telia Parken, Copenhagen-ah England-in beisei an pha lo a, Iceland nena hmuhnawm Jadon Sancho dah ṭhatin a awm a, Harry Kane leh Raheem Sterling te pawhin an theihna angin an khel chhuak lo.

Denmark lamin chance an nei ṭha zawk a, Kasper Dolberg-a goal khung tur keeper Jordan Pickford-a'n a dansak. Inkhel chawhnu lamah Christian Eriksen-a'n goal a khung teuh viau bawk. Hun tawp hma deuhin Kane-a'n cross bar chung chiahah a tauh a, chak theihna tur goal ni mah se an khelh dan thlirin goal khung hi an phu lo!

Denmark-in an match hnuhnung pariat zinga parukah goal an chhuah lo a, hemi hun chhungah hian goal thum chauh an chhuah. Leicester City keeper Kasper Schmeichel-a telna team hi an tlarhnung an phui ṭha a, chutihrualin an match hnuhnung berah Belgium-in 2-0 in an hneh.

England manager Gareth Southgate-a'n 3-4-3 formation hmangin midfield-ah Declan Rice leh Kalvin Phillips te a inkawptir a, mual sir aṭangin Kieran Trippier leh Alexander-Arnold te an awm a, Denmark nen an khelh dan aṭanga thlir chuan a hlawhtling lo.

Inkhelh banah Southgate chuan, "Khelh dan phung thar kan enchhin a, kan khelh leh hunah chuan kan bel lehzual ang. First half-ah khan na zawka nawr thei tur kan ni a, amaherawhchu him taka khelh kan duh," tiin an khelh dan hmang a sawifiah.

Denmark hian Kasper Hjulmand hnuaia an match hnih khelhna a ni a, goal an khung lo ve ve. Denmark midfielder Christian Eriksen chuan, "Match tina goal khung hi kan duh a, amaherawhchu kan match hmasa pahniha kan hmachhawn te hi an harsa ve bawk a ni. Belgium kan khelh ṭum ai chuan kan khel ṭha tawh zawk," tiin chak zo lo mah se lawmna tur a awm thu a sawi.