Inter Village Football : A ruh no zawk an chhuak zel dawn

GIG Motors All Mizoram Inter Village Football Championship 2024-ah team 32 chauh an dam tawh a, vawiin hian third round khelh ṭan a ni dawn. RG Stadium leh 1st Bn MAP Ground-ah tualchhung foootball hmuhnawm thlir tur a awm ang.

Bethlehem Vengthlang hi Mizo coach ṭha Lalsangzuala Hmar enkawl a ni a, Hriphaw lakah chuan chungnung zawk tura ngaih an ni. Chutihrualin Salem Veng leh Thenzawl Jt. inkhel tur erawh chak zawk tur hriatthiam a har hle.

CYMA Football 2023-ah Joseph Lalnunpuia freekick hmangin Salem Vengin 1-0 in Thenzawl Jt an hneh a, tun ṭumah erawh Thenzawl hi team ṭha zawk tura ngaih a ni.

Mission Veng leh Kolasib Joint inkhel tur hi hmuhnawm ber turah a ngaih theih. Kolasib Jt hian 21-0 ngawtin Sakawrtuichhun an hneh thei a, player ṭha an kawl tel. Paul Ramfangzauva, Isaak Malsawmkima, Lalhunmawia leh PC Pazawna te awmna a nih avangin champion thei team an ni a, First Division club nei Mission Veng tan pawh an ṭhat hret a rinawm.

1st MAP Ground, Armed Vengah football thiam veng Republic Vengin MPL club nei Chawnpui an hmachhawn dawn. Republic Veng hi Mizo striker ṭha zinga mi F. Lalrinpuia (Valpuia) enkawl a ni a, Valpuia hi player angin an inziaklut tel bawk.

Vairengte Jt leh Durtlang te an inkhel zui dawn. Inter Village Futsal-ah Durtlang an champion zo chiah a, football-ah pawh an ṭha tho. Phunchawng leh Melbuk ten an tawp an khar dawn a, Melbuk hi team ṭha zawk tura ngaih an ni.

Inter Village Football-ah chuan result danglam tak a thleng fo a, inkhel entu mipui an pawimawh. Mizoram Premier League angin squad a chhah a ṭha thei lo a, hei vang hian entu mipui auh zam theih an awm a, fuih phur theih an awm bawk. Vawiinah pawh ṭantu neih ṭhat a pawimawh ang.