Arsenal leh Chelsea hlim zanah City an ngui

Premier League champion tum Arsenal leh Chelsea ten point thum an hlawh chhuah laiin, nomawi kawl mektu Manchester City erawh Tottenham Hotspur lakah 4-0 in am mualpho - English football inelna sang berah champion tur chiang leh rinkai bik an awm thei ta lo.

Inrinni zan tirah Chelsea chuan Leicester City 2-0 in an hneh - Blues coach Enzo Maresca-a'n a club hlui lakah zahngaihna a lantir lo. Mikel Arteta enkawl Arsenal pawhin kawng dik an zawh ve leh ta a, an mikhual Nottingham Forest chu 3-0 in an hneh.

Blues an chak

King Powe Stadium hi tun hma lama Maresca lo chettlat tawhna hmun a ni a, mipui lawm pawh a hlawh. Tunah erawh Chelsea enkawltu a ni tawh a, thil tum dang a neih a ngai tawh - Blues chakpui chu a hna a ni tawh tlat.

Tun hnaia khel ṭha ṭhin tak Enzo Fernandez chuan minute 15-naah Nicolas Jackson tan a siamsak. Goal luh dawnah Foxer player ten harsa vak loa chinfel theih tur an pet chhuak thei tlat lo a, striker Jackson-a'n a khung ṭha hrim hrim bawk.

Kum 23 mi Jackson hian khualmualah match a khelh hnuhnung pali aṭangin goal nga a khung. Goal lut tur siamsaktu Argentine midfielder Fernandez chuan second half-ah a tuh lut bawk a, hun tawp dawna Jordan Ayew goal khungin awmzia a nei phak tawh lo.

Chelsea manager Maresca chuan, "Enzo khan a khel ṭha takzet a, ram tan hmun hla taka feh chhuak hlim hlawl ni mah se kan tan a khel ṭha nghal hle. Enzo hian theihna sang tak a nei a, box chhunga lut tam turin ka fuih, a rah chu kan hmu niah ka ngai," a ti.

Laipui a puak

Arsenal an chak hleih theih loh avangin thasik tak tak thlen hmain Premier League nomawi beiseina a chau hman ṭep a, mahse tunah chuan beiseina thar nen an hawi chhuak ve leh thei ta - Champions League khelh pawh an phur phah deuh ang.

Mikel Arteta-a'n a hman rim Kai Havertz, Declan Rice leh Gabriel Martinelli te bench lamah a dah a, an buai phah chuang lo. Bukayo Saka, Thomas Partey leh Ethan Nwaneri-a te goal khat ṭheuh hmangin nuamsa takin hnehna an chang.

North London club tana chanchin lawmawm chu Martin Odegaard chetla kha a ni ang. Norway captain hi hliam vangin rei tak a chawl a, a inkhelh theih loh chhungin Gunners goal nawr a na tawk lo, tunah erawh a bik takin Saka a hlauhawm zual phah leh ta tih a lang.

Odegaard hi Mikel Merino nen an inkawp rem viau a, tuna chuan Rice pawhin elpui hautak a nei tih hriain a ṭang lehzual ngei ang. Thawhlehnin zanah Sporting Losbon nen UCL an khel zui dawn a, Havertz leh Rice te an inlan thung a rinawm.

City an zawr

Etihad Stadium hi mikhual tana inkhelh harsatna hmun a ni a, mualneitu Manchester City hi match 52 chhung tehmeuh chu tlawm loin an kaltluang - mahse tunah chuan an record duhawm tak chu thaichhiatsak an ni ta.

Pep Guardiola naute an nghet tawk lo a, mikhual Spurs tan James Maddison-a'n goal hnih a khung bakah Pedro Porro leh Brennan Johnson ten an khung belh a, striker ṭha Erling Haaland leh a ṭhain ten a chhanletna tur an nei ve lo.

Kum 2003 khan Man City hi an mikhual Arsenal lakah 5-1 in an tlawm tawh, chumi hnuah tun ṭum hi anmahni khelmuala an chak loh chian ber ṭum a ni. Guardiol-a nauten insiamṭhat an mamawh takzet, siamrem ngai an ngah dawn.

Man City hian Thawhlehni zan hian UCL khel turin Feyenoord an mikhual dawn a, kar tawpah Premier League hmahruaitu Liverpool an lenchilh bawk ang - Pepa-'n Man City a enkawl china a hun khirh bera chhal theih tur a tawng mek.