Mizo hlanga khel Aizawl FC an vanduai

Aizawl FC-in Inrinni zan khan tun season I League match hmasa ber chu RG Stadium, Mualpuiah an khel a, Dempo SC nen goal awm loin an inhnehtawk. Victor Lalbiakmawia hote Mizo hlanga an khelh bakah hliam vanga an kim lo chungin chak thei dinhmunah an ding a, tlarhmaah an hriam tawk lo.

Mizo club-in Mizo hlangin an khel a, ṭawiawmtu Mizo an nei chhe lo. November 29, Zirtawpni zan hian kai thar SC Bengaluru an mikhual lehnghal dawn a, match hmasa bera an khelh dan avangin inrintawkna nasa tak an nei thei ang a, ṭawiawmtu pawh an nei ṭha zawk ngei ang.

Chance a awm

Dempo SC hi an club legend Samir Subash Naik-a'n team a ho a, foreigner pahnih striker Matija Babović leh defender Shaher Shaheen ten bul an ṭan. Mikhualna hmunah ball chang tam zawk an ni thei a, ball an in pass kual ṭha zawk.

Mahse, Goan club hian goal chance an insiam thei lo a, Mizo club-in chance ṭha an ngah zawk. Midfield-ah MPL11 final-a chakna goal khungtu Lalawmpuia Sailo leh an player thar Saitual tlangval Zothanpuia te an inkawp.

Puipuia hian box pawn aṭangin a pet thut a, Dempo goalkeeper Ashish Sibi tan harsatna a tling pha. MPL11 top scorer Lalbiakdika pawhin box pawn aṭang thoin crossbar chungah a pet bawk.

Chance ṭha bik erawh Lalhriatpuia'n a nei a, Aizawl FC striker hian box chhungah ball ṭha hmu mah se a pet fuh tawk lo. Farkawn/Republic Veng tlangval hian second half-ah pawh goal khung theihna tur ṭum hnih a hlah a, I League-a goal khung turin a lu leh ke a tah hriam a ṭul.

Engtin zel?

Aizawl FC-in Mizo hlanga an khel chungin chak thei dinhmunah an ding a, mual sira awm BD-a leh Augustine Lalrochana te an hmuhnawm. Man of the match-a thlan Augustine pawh khel ṭha viau mah se goal hmaah a vannei bik lo.

Mizo club hian risk an la ngam bik lo a, goal khung an harsat chungin minute 80 hnuah substitution an siam chauh. Season liam taa I League top scorer Lalrinzuala leh winger Malsawmzuala Tlangte te an rawn lut a, result erawh an ti danglam thei lo.

Aizawl FC-in midfielder ball thiam Samuel Lalmuanpuia inhliam an tuar a tih theih a, winger Laltlanzova awm se bench aṭanga lut thei tur player an ngah sawt dawn. Mizo club hi an squad a chhah tawk loh avangin champion beisei ngam tur chuan an muala point thum hmuh a pawimawh a, kai thar Bengaluru SC lakah chak ngei a ṭul tawh ang.