Barcelona chak zo lo

Goal hnih khung hmasa mah se Barcelona chuan an hum thei lo a, an mikhualna ramah Celta Vigo nen 2-2 in an inhnehtawk - La Liga hmahruaitu la ni tho mah se an dinhmun a nghet tawk tawh bik lo.

Inrinni zan Estadio Abanca-Balaídos-a inkhelah Catalan club hian Raphinha hmangin goal an khung hmasa a, second half-ah striker ṭha Robert Lewandowski chuan tun season a league goal 15-na a khung.

Hansi Flick-a naute hi nuamsa deuh taka chak tur angin an lang hman, amaherawhchu an beisei ang ngawtin thil a kal bik lo. Minute 82-naah midfielder Marc Casado chu yellow card pahnihna hmuh vanga hnawhchhuah a ni.

An kim loh hnuah Barce an talbuai tlat - Casado awm loh hnuah goal hnih an chhuah.Celta Vigo tan Alfon Gonzalez leh Hugo Alvarez ten an sut a, point khat ve veah an lungawi a ngai.

Barcelona hian league match 14 aṭangin point 34 an hmu a, khelh zat inangah Atletico Madrid chuan point 29 hmuin pahnihna an ni. Real Madrid chuan match hnihin an khel tlem a, an hmabakah an chak ve ve chuan Barca nen an inkarah point khat chauh a awm thei ang.