I League-ah Mizo an mawi

Tun season I League-ah Mizo tlangval Lalromawia'n goal hmasa ber a khung a, Mizo tlangval pahnih R. Ramdinthara leh Edmund Lalrindika ten an club Gokulam Kerala leh Sreenidi Deccan tan chakna goal an khung ve ve bawk.

November 22, Zirtawpni khan I League match hmasa ber hi khelh a ni a, Gokulam Kerala-in Sreenidi Deccan 3-2 in an hneh. Sreenidi hi I League hnuhnung pahniha ni thei ve ve an ni a, tun ṭumah pawh champion rinkai an ni pha.

Samlukhai tlangval Romawia'n Sreenidi goal hmahruai a khung a, Hyderabad club tan hian Lunglei tlangval B. Lalnuntluanga'n bul a ṭan ve bawk. Inkhel nung ṭha takah mikhual team Gokulam-in Martin Chaves leh Nacho Abeledo te goal hmangin an lehthal.

Aizawl FC aṭanga Gokulam zawmtu Tharpuia chu minute 90-naah luhtir a ni a, Champhai Kanan tlangval hian minute nga hnuah goal a khung nghal. Sreenidi tan David Munoz-a'n goal a khung ve leh bawk avangin Tharpuia goal hi Gokulam chakna goal a ni.

Tun season I League-ah Gokulam leh Sreenidi bakah Inter Kashi chu champion rinkai an ni a; Varanasi, Uttar Pradesh club Inter hian India international Edmund Lalrindika an kawl. Naihati Bankimanjali Stadium-a inkhelah Lunglei tlangval Edmund hian minute 72-naah goal awmchhun a khung.