Retegui - Italy mamawh chhanna striker?

Italy hi attacking football vanga lar an ni ngai lo. Mahse, an tlarhma en ila, Filippo Inzaghi, Christian Vieri, Luca Toni leh Vincenzo Montella nei ṭhin ram an ni a, anmahni ṭantu tam takin duat taka 'Azzurri' tih ngata an koh team hian striker neih ṭhat loh an inhmeh lo!

Ni e, striker beiseiawm tak tak sawi tur ting chu an awm ve ṭhin - mahse, Italian striker ropuite sulhnu chhui phak an awm lo a, an tan an hnutchhiah pheikhawk chu a lian lutuk hret a, an inthawlh zo lo a ni ber.

Euro 2020-a Italy an champion khan fan-te an lawm em em a, an sapatal a nih kha. Mahse, Italian football expert-te chuan uluk takin an thlir a, Italian striker ṭhangduang awm miah loin engtin nge kan ṭhan zel ang? tih an ngaihtuah a, a chhanna an van a ni.

Khatihlaia Italy coach Roberto Mancini kha tam tak hriat lohin a lo mangang ru daih tawh a, Italian thisen kai ni si, an ram tana inlan duh tur striker a zawng - a tawpah Mateo Retegui a hmu a, hawikir a tum tawh lo.

Mancini fapa

Italy-in March 2023-ah England leh Malta te Euro qualifier-ah an hmachhawn a, coach Mancini chuan Retegui hi ram tana inlan turin a ko mauh mai - hetihlai hi Argentine Primera División lama Tiger tana a khelh lai a la ni a, 2022 season-ah phei chuan match 42-ah goal 23 a khung.

Mancini-a'n age level-a Argentina tana inlan striker hi Italian thisen kai a ni tih hriain ram tana inlan turin a sawm a, Italian fans tam takin an pawm lo - an ram striker chu Argentine, South America rama inkhel a ni ang maw?

Chu mai a ni lo. Retegui-a pa leh unaunute chu hockey player an ni a, Olympic-a silver medal dawng an ni. An chhungkaw dinhmun thlir pawhin football chhungkua tih tur an ni lo a, Italian fans tam takin an iai.

Mahse, mahni thu duh ve tak Mancini-a'n midang sawiselna chhan a tum lo a, Retegui chungah rinna a nghat lui a, ram tana inlan turin a ko. He Argentine ni lo, Italian striker hian ram tana a match hmasa berah goal a khung nghal - Naples khawpuiah, England lakah ngat lehnghal!

A te lo aw!

Italy head coach Mancini a ngawi mai mai lo. Manchester City boss hlui hian, "Mateo hian goal khung a thei a, chu chu thil mai mai a ni hleinem - classical centre-forward a ni a, Italy-a Gabriel Batistuta lo thlen tirh kha min hriatchhuah tir a ni," a ti hial!

E khai - Batistuta nen meuha khaikhin hlawh phak striker chu eng ang taka ṭha ni ang maw? Mancini erawh a fing tlat a, a player hi fak viau mah se, pressure pek a duh lo. Mancini chuan, "Hun erawh a mamawh a, zir tur tam tak a la nei a ni," a ti a, a striker a chhan lawk.

Mancini hian sawi zawmin, "Serie A a khel a nih chuan a tan a ṭha dawn. A chak sawt ang a, kan ṭawng a zir ang a, chu chuan a khelhpuite nena an inbiakna kawngah nasa takin a pui ang," a ti a, Italy tana lunghlu tling turin an rama a khelh phawt a ṭul tih a sawi.

Retegui hi Italian club lian Inter Milan nen sawizawm an ni nghal a, mahse, rin loh takin Serie A club Genoa chuan euro maktaduai 15-in July 2023 khan Boca Juniors aṭangin an lei chhuak a, an ram striker thar an chang.

Hello Italy

Retegui-a'n Genoa tan Serie A a hmachhawn a, Italian top flight league-a a season hmasa berah chuti luain goal khung tam lo mah se, a club khelhna thlirin tuman an dem lo a, team tana a ṭangkaina an hmuh hmaih lo.

Italy tan vawi 18 inlana goal ruk khungtu hian Genoa tan a season khatnaah hian, inelna hrang hrangah match 31 khelin goal kua a khung a, a khel chhe hran lo - mahse, hei aia sang zawk hi fan-ten an la duh cheu.

European football-a team hmuhnawm pawl, player langsar kawl lo chunga attacking football hmuhnawm pho chhuak ṭhin, Europa League champion Atalanta an lo lang vat a, an striker chhuanvawr Gianluca Scamacca a inhliam bawk avangin Retegui an dawr.

Atalanta hian €28mtd ngawt Retegui manah an theh chhuak a, Italy international striker hian a khelh dan nena inrem tak tur Gian Piero Gasperini enkawl team a pan.

Par a chhuang

Retegui hian Genoa-ah khan goal a khung tam tawk lo a, chutihrual chuan thla thum ngawt hliam vanga a chawlh a ngaih avangin insiamrem a mamawh - coach Alberto Gilardino-a'n pressing game a khelhtir nasa bawk.

A tawi zawnga sawi chuan Retegui tan Genoa chu inzirna a ni a, Atalanta erawh a puitling tawk tawh tih pholanna tur a ni - chutiang chiah chuan a ti a, Atalanta tana a Serie A match hmasa 12-ah goal 11 ngawt a khung!

Minute 71 dan zela goal khung ang a ni a, Atalanta hi mang ramah a chenpui mek - Serie A table-ah pahnihna an ni mek a, hmahruaitu Napoli chu point khat chauhin an phak lo a, Serie A nomawi la chawi ngai lo team hian Italian champion nih hial an sawi ri tawh!

Atalanta hian kum 1963-a Coppa Italia nomawi an chawi leh, season hmasaa Europa League nomawi an chawi bak kha champion nomawi liantham sawi tur an nei lo a, Scudetto an chawi leh thei a nih ngat chuan a ropuizia thua sawifiah chi a ni lo ang.

Ka lawm e, Gasperini

Retegui-a'n a chet ṭhat theih chhana a fak ber chu an coach Gasperini a ni. Italian striker chuan, "Gasperini-a'n min khelhtir dan hi ka nuam tihzawng tak a ni. Kan vaiin kan nawr a, chance pawh tam tak kan insiam ṭhin.

"Manager leh a staff-te nen vawi tam kan inkawm a, anni pawhin ka laka an beisei angte video hmangten min entir fo ṭhin - ka tan chuan hei lo liama nuam hi a awm bik chuang lo.

"Keimaha a ṭha thei ang ber hi sawrchhuah an duh a, chu chu a tihdan an hre em em bawk. Kei lahin inzir zel hi nuam ka lo ti em em bawk si a ni," a ti a, a awmna tur hmunah tak a awm thu a sawi.

Atalanta hian tun season Serie A-ah match 12 khelin goal 31 ngawt an khung tawh a, an khung tam fal nalh - anmahni hnaih bertu Inter Milan hian goal 26 chauh an la khung a, goal nga ngawtin an khung tam zawk tihna a ni.

Mamawh chhanna

Retegui hi 6ft 1in laia sang niin, box chhungah a hriam em em a, a khelhpuite nena an 'link up' ṭhatna tura a thawhrimna chu fak hlawh a ni bawk - penalty box-ah riak chawt loin a tlan let tam a, midfield-ah te hun a hmang fo.

Hmun awl siam tura tlan hmaa, one-two pass chu a duh dan a ni a, hei hian a khelhpui Ademola Lookman-te mual sira awmin, a chhunga tlan lut turin hmun awl a siamsak ṭhin a, goal an khung tam phah - Nigerian forward pawh hian goal ruk a khung tawh.

Hei mai a ni lo - boruakah Retegui a ṭha a, box chhunga a awm tawh chuan goal khung tum ṭhin a ni. Euro 2024-a beisei an phak loh khan Italy manager Luciano Spalletti chuan squad thlak danglam hlawk a ṭul thu a sawi a, Italy-in inṭhuahfai an tum.

Spalletti-a hnuaia Italy team indinthar turah pawh Retegui chu a hmahruaitu ni tura beisei a ni a, age level-a Argentina tana inlan striker kha Italy innghahna a ni ta - engtin chhang zel ang maw? Hunin min la hrilh ang.