Bayern chakna Harry Kane

Harry Kane chu Bundesliga goal 50 khung tling tura match mamawh tlem ber a ni - England international striker hian Zirtawpni zan khan Augsburg lakah hattrick a siam a, a team hi 3-0 in a chakpui.

Bavarians hmatawng hian awlsam tak erawh chuan goal a khung mai bik lo. Minute 63-naah penalty aṭangin a khung ṭan a, goal hnih dang hi injury time-a a khung a ni thung.

German football inelna sang berah Kane hian goal 50 khung turin match 43 chauh a hmang a, record hmasa chelhtu Erling Haaland a khum chiang hle. Haaland tan Borussia Dortmund tana a khelh laiin match 50 aṭangin goal 50 a lo khung tawh a ni.

Champion duh vanga Bayern Munich zawmtu Kane chuan, "Augsburg khan tlarhnung an veng ṭha em em a, paltlang an harsa dawn tih pawh kha kan hrethiam, dawhthei takin kan remchang neih hun kan nghak.

"Ram tana kan feh chhuah avangin club lamah training kan zawm tam thei tawk lo a, chuvangin mahni duh ang taka khelh a harsat chang pawh a awm, mahse kan mamawh zat goal kan khung thei," tiin a sawi.

Vincent Kompany enkawl Bayern Munich hian tun season Bundesliga match 11 an khelh aṭangin point 29 an hmu a, table chung berah an awm mek - anmahni hnaih bertu Eintracht Frankfurt aiin point rukin an sang fal mek a ni.