NBA champion Bucks an tla

Nimin zing khan Milwaukee Bucks chu NBA playoff aṭangin an tla. Eastern Conference semifinal inkhelah Bucks hi Miami Heat lakah 103-94 in an tlawm, kum 2014 hnua conference final lut leh turin Heat hian series chu 4-1 in an la a ni.

HP Field House-a inkhelah Heat an ṭang-rual, player mala langsar fal awm lo mah se - Jimmy Butler (17 points), Jae Crowder (16), Bam Adebayo (13), Goran Dragic (17) leh Tyler Herro (17) te an khelh ṭhat rual avangin an tum ram an thleng.

Bucks hi chak tura rinkai leh seeded pakhatna ni mah se beisei an phak lo. An thiampuipa Giannis Antetokounmpo chu game 4 an khelh ṭuma a hliam avangin a inlan thei lo a, a aiawh zo an awm lo.

Eastern Conference final-ah Heat hian Toronto Raptors leh Boston Celtics inkhela chak zawk an hmachhawn ang. Celtics hian series-ah 3-2 in hma an hruai mek, tukin hian game 6 an khel a, an chak leh a nih chuan an tlang ang. Raptors lam an chak a nih erawh chuan game 7 an khelh a ngai dawn.

Nimin zing Western Conference semifinal-ah Los Angeles Lakers chuan Houston Rockets 112-102 in an hneh a, Lakers hian series-ah 2-1 in hma an hruai - Zirtawpni zing dar 4:30-ah game 4 an khel leh ang.

Lakers star LeBron James-a'n point 36 neiin tha thawh hlawk ber a ni leh a, a thiam chin inelna NBA playoff bikah match 162 ngawt a team a chakpui tawh - record nei ṭha ber a ni, sulhnu ṭha a neih hi a belhchhah zel pawh 

a rinawm.