Community Shield khelh hun sawn tum

English football-a thuneitu sang ber Football Association chuan kum 2021 atan Community Shield  khelhna hmun Wembley chu sawn an tum a, hei hi Women's European Championship khelh tur nen a hun a in an hlauhthawn vang a ni. 

Women's Euro 2021 hi July 7-ah khelh ṭan a ni dawn a, final hi August 1-ah Wembley-ah khelh tura tih a ni thung. Kum 1974 aṭang khan Wembley hi Community Shield khelhna hmun atan an hmang ṭan. 

Mahse, 2001-2006 inkar khan he stadium hi sak ṭhat a ni a, hetih chhung hian Cardiff's Millennium Stadium-ah (Principality Stadium tih a ni tawh) khelh a ni thung. 

Kum 2012 pawh khan Community Shield hi Aston Villa mual Villa Park-ah khelh a lo ni tawh a, hemi ṭuma Wembley aṭanga sawn a nih chhan hi Olympic men's gold medal match chu Wembley-in a thlen vang a ni. 

FA chuan season ṭan hmaa Premier League champion leh FA Cup champion inel nan Community Shield hi a hmang a, Manchester City-in nomawi pahnih an chawi avangin tun season ṭan dawn khan City leh Premier League pahnihna Liverpool ten an khel a, penalty-ah 5-4 in City an chak.