PFA Player of the Year Kevin De Bruyne

Professional Footballers' Asso-ciation chuan Manchester City midfielder Kevin de Bruyne hnenah Players' Player of the Year award an hlan. Kum 29 mi De Bruyne hian City manager Pep Guardiola chu tun dinhmun a thlen theihna chhan tiin a fak hle.

PFA Awards hi 1973-74 season tawp aṭanga sem ṭan a ni a, Belgian midfielder hi Manchester City player dawng hmasa ber a ni. De Bruyne hian chawimawina dawng tur hian Liverpool player pali Virgil van Dijk, Trent Alexander-Arnold, Sadio Mane, Jordan Henderson leh City tana a khelhpui Raheem Sterling te a khum a ni.

De Bruyne chuan, "Kan elpuite leh kan khelhpuiten player ṭha ber atan min thlang a ni a, ka ngai hlu hle. Man City-in player ṭha tak tak an nei tawh chunga a hmasa ber ka ni hi mak ka ti a, chutihrualin City hminga hetianga chawimawina ka dawng hi ka lawm," tiin a sawi.

City manager Pep Guardiola chungchang sawiin De Bruyne chuan, "Guardiola hian zalenna min pe a, a chhan ka sawi thei lo - kan pahnih inkara thil kal dan a ni. Team tan ka theihna zawng zawng ka chhuah dawn tih hi a hria a, keimahah hian rinna pumhlum a nghat," tiin Spanish manager a fak.

PFA Player of the Year hi a zawnin a vawi thum nan nomawi chawi lo player-in an dawng a, De Bruyne hma hian Reds duo Virgil van Dijk leh Mohamed Salah ten an dawng tawh. Season liam ta khan Belgian midfielder hian assists vawi 20 a neih bakah goal 13 a khung a, Man City hi pahnihna ni mah se tun ṭuma chawimawina dawn hi a phu hle.

Liverpool right back Trent Alexander-Arnold-a'n Young Player of the Year award a dawng a, kum 21 mi defender hian Manchester United player pahnih Marcus Rashford leh Mason Greenwood, Chelsea forward Tammy Abraham leh midfielder Mason Mount bakah Arsenal midfielder Bukayo Saka te a khum a ni.

Manchester United forward Rashford chuan naupang retheite tana a hmalakna avangin PFA merit award a dawng.