Liverpool an sang fal zel

Southampton khelmualah Liverpool-in vannei takin hnehna an chang a, 3-2 in Saints lakah an chak - Reds-in an mikhualna ramah beisei phak lo mah se, a pawimawh ber point thum an hlawh chhuak a, hei hi 'champion zia' tia kan sawi ṭhin kha a ni.

Tottenham Hotspur laka Manchester City tlawm thu hre sain Liverpool an inlan a, an chak chuan Pep Guardiola team hi point riat ngawtin an tlansan thei dawn tih an hria - minute 30-na leka Saints tlarhnung tihsual zarah an khung nghal.

Southampton defen-sive midfielder Flynn Downes chuan Liverpool champion loh a hlau em ni chu aw, tih mai turin Dominik Szoboszlai ball a pe a - Hungarian midfielder hian goal class bik khung nan a hmang.

Mahse, Liverpool tlarhnung an khawng bik lo. Chesual khât tak captain Virgil van Dijk a chesual a, a ball hloh chu Andy Robertson-a'n humsak tumin, Tyler Dibling lakah a foul. Video assistant referee (VAR) rawn a nih hnuah referee-in penalty spot a kawk a, Caoimhin Kelleher-a'n Adam Armstrong-a pet dang mah se, a per lehlam chu Armstrong hian goal-ah a chantir ta tho.

1-1 in chawlhlawk hman a ni a, rin loh zawkin hmahruaina goal an khung zui. Mateus Fernandes chuan minute 56-naah Saints goal hnihna a khung a, table mawngphaha awm team-in Premier League hmahruaitu lakah hma an hruai!

Mahse, tun season-a tlarhnung pawp Saints-in an tlarhnung pawp bawk an tuar nawn. Keeper Alex McCarthy a chesual a, Ryan Gravenberch-a long ball man a tumna lamah Mohamed Salah chuan thlen khalhin, goal ruakah si phurh sutna goal a khung.

Southampton an insiamṭha lo - defender Yuki Sugawara chuan ṭul lo takin penalty box-ah a kutin ball a tawk fuh a, Salah chuan penalty petin, goal-ah a chantir a, 3-2 in Liverpool an chak.

Reds boss Arne Slot chuan, "A pawimawh ber chu kan hnufual hnua kan bei let kha a ni a, chutihrual chuan Saints-in kan penalty area an luh kha chu vawi hnih chauh a ni - scoreline chauh en tan chuan harsa taka chak angin kan lang mai thei a, mahse, inkhel pumpui thlirin inkhel kan thunun a, chak kan phu a ni," a ti.

Liverpool hian league match 12 aṭanga point 31 hmuin, anmahni hnaih bertu City aiin point riat ngawtin an sang zawk a, Nilaini zanah Champions League match khel tura Real Madrid mikhual zuiin, Pathianni zan Premier League-ah Manchester City an mikhual bawk ang.