A naute ringtawktu Guardiola

Tun hnaiah chak lo tluang viau mah se Pep Guardiola a beidawng lo - Manchester City manager hian hun thim an tawh mek aṭanga tho chhuak turin a naute a ringtawk tih a sawi a, an insiamṭhat theih ngei a beisei.

Spanish manager hian tun hnai khan season hnih daih contract a ziak thar, inremna an ziah aṭanga ni hnih hnu lekah Tottenham Hotspur chu 4-0 in an ngam lo, an match hnuhnung pangaah an tlawm fai vek.

Premier League champion lai hian zanin dar 1:30 hian Champions League khel turin Feyenoord an mikhual dawn, tunlai an boruak fuh lo tak siamṭhat theihna hun tur a ni thei ang a, buaina belhchhahtu a nih theih bawk avangin fimkhur a ngai dawn hle.

Man City manager Guardiola chuan, "Tun hma zawng aiin tunah hian ka naute hi ka ringtawk zawk, tu pawh mai hian chak an duhin an chak vek, a chang chuan kan duh loh result kan chungah a lo thleng ve ṭhin.

"Tumah hian rei tak chhungin i chak lo ang u, tia ngaihtuahna hmang an awm lo tih chu thil chiangsa a ni a, a rang thei ang bera tho chhuak leh turin theihna kan nei," tiin a sawi a, zaninah insiamṭhat ngei an tum ang.

Man City hian Ballon d'Or dawngtu Rodri chu tun season chhung atan an chhawr thei dawn tawh lo. Croatia midfielder Mateo Kovacic a hliam bawk, midfield lailum luah tur tun hma angin an ṭha tawk rih lo deuh a ni.

EPL champion hi an defender ṭhenkhat hliam vangin an buai bawk a, tun hnaiah John Stones leh Kyle Walker te an khel thei pangngai leh ta a, an match lehpekah chuan Manuel Akanji leh Nathan Ake ten ngai an awh leh tawh tura beisei niin, Josko Gvardiol a awm bawk.

Zanina City khingpui tur Feyenoord hi Dutch league lama palina ni lai an ni a, an tlarhnung a phui tawk loh avangin Erling Haaland leh a ṭhiante insiamṭhat tum hian goal an khung nual a nih pawhin a mak lo ang.