Sinner hoin Italy an champion

Jannik Sinner tan season duhawm leh ṭha bik a ni - mimal taka a chet ṭhat bakah an ram Italy chu Davis Cup title a lakpui bawk. Italy hian Netherlands chu 2-0 a hnehin an chungnung ber.

Mipa tennis team hmanga inelna Davis Cup hi best of three hmanga chak zawk zawn a ni a, singles match hmasa zawkah Matteo Berrettini chuan Dutch tlangval Botic van de Zandschulp chu 6-4, 6-2 a hnehin Italy chu dinhmun ṭhaah a dah.

Match hnihnaah Sinner a rawn ding chhuak a, inkhel hmuhnawmah world number 1 hian Tallon Griekspoor chu 7-6 (7-2), 6-2 in a hneh a, match hmasa pahnihah an chak nghal avangin match hnuhnung ber khelh ngai loin Italy an chak nghal.

Kum 23 mi Sinner chuan, "Italy tana kan inlan a nih chuan kan koah mawhphurhna sang tak a awm tihna a ni a, chumi kan hlen chhuak thei chu a lawmawm," tiin a sawi a, mimal aiin team an pawimawh tih a sawi bawk.

Italian tlangval hian tun season chhungin Australian Open, US Open leh ATP Finals title a la thei a, inelna tenau dangah a champion bawk - tun hnai thla 12 chhungin ATP Tour match 76 a khelh zingah vawi ruk chauh chak loh a nei.