Melbukin goal an surtir

G.I.G Motors MFA All Mizoram Inter Village Football Championship 2024-ah team ṭha leh team nem deuh an inthliar zel a, nimin tlai khan Melbuk chuan Phunchawng chu 12-0 ngawtin an sawp. 1st Bn MAP Ground-a inkhel dangah team ṭha dang Republic Veng leh Durtlang ten hnehna an chang bawk.

RG Stadium, Mualpuia inkhelah Bethlehem Vengthlangin Hriphaw 7-2 in an sawp a, Salem Vengin an veng mipui hmaah Thenzawl Joint 2-1 in an hneh. Kolasib Joint-in team ṭha an nihzia pholangin Mission Veng 5-0 in an hneh.

A ruh no an chhuak

Chawnpuiin MPL club nei mah se veng leh veng inelnaah erawh an squad a la chhah tawk lo a, Republic Veng lakah 5-2 in an chak lo. Republic Veng coach F. Lalrinpuia'n Santosh Trophy-a Mizoram right back Laltluangliana chu right winger-ah chhawrin inkhel tidanglamtu a ni a, Tluangliana hian goal hmasa berah a khung bakah Chawnpui tlarhnung tan a hnawksak hle.

Tluangliana goal hi Chawnpui tan Amosa Vanlalruata'n sutin first half-ah 1-1 ni mah se inkhel thununtu Republic Vengin Lalnunzira penalty hmanga hma an hruai nawn hnuah harsatna an nei tawh lo. An phu angin 5-2 in hnehna an chang.

Durtlangin anmahni ang bawka team ṭha Vairengte hmachhawn mah se an squad neihchhah rah an seng. Mizoram winger HK Lalhruaitluanga'n mual vei lam aṭangin kawh zetin minute riatnaah goal hmahruai a khung a, second half ṭantirhah Zoengmawia Hlawndo hmangin Variengtein an sut.

Ricky Lallawmawma leh Crespo Vanlalhriatpuia te telna Durtlang an vannei ta zawk a, minute 84-naah box pawn aṭanga Joseph Vanlalhruaia ball pet chu box chhunga awm Joseph Lalrinawma Sailo-in dang perin goal-ah a lut. Durtlang 2-1 in an chak.

1st Bn MAP Ground-a inkhel hnuhnung berah F. Lalrozara enkawl Melbukin Phunchawng 12-0 ngawtin an sawp. Mizoram tana pawha khel tawh captain Lallawmsanga'n goal ruk ngawt a khung a, Lalbiakmuana'n goal nga khungin Lalremruata'n goal khat a khung bawk.

Team ṭha an chak

RG Stadium-ah Lalsangzuala Hmar enkawl BVT-in Hriphaw lakah goal chhuah hmasa mah se goal sarih ngawt an khung a, 7-2 in an chak. BVT tan Malsawmzela'n hattrick a siam a, Lalmuankima, K. Malsawmdawngkima, Emmanuel leh Rampianmawia ten goal khat ṭheuh an khung.

Beisei lawk ang ngeiin Salem Veng leh Thenzawl inkhel a hmuhnawm a, Salem Vengin striker ṭha David Lalchhuanawma an neih an vanneihpui. David hian minute 19-naah goal hmahruai a khung a, Thenzawlin F. Lalhmangaihzuala hmangin sut mah se Salem Veng tan David hian minute 55-naah chakna goal a khung.

Kolasib Joint-in an match hmasa berah goal 21 an khung thei a, last 32-ah pawh chak turin harsatna an tawk lo - Mission Veng 5-0 in an hneh. Kolasib tan PC Pazawna'n goal hnih khungin Odisha FC midfielder hlui Paul Ramfangzauva, Mizoram Police winger Isak Malsawmkima leh Samuel Lalruatfela ten goal khat ṭheuh an khung.