Zir tur la ngah Amorim 'Man United'
Ruben Amorim hnuaiah Manchester United-in bul an ṭan a, Portman Road-ah kai thar Ipswich Town nen 1-1 in an inhnehtawk. Pathianni zan inkhelah mikhual team-in bul ṭan ṭhain Marcus Rashford hmangin minute hnihnaah khung nghal mah se Ipswich-in Omari Hutchison hmangin an sut.
Man United-in kai thar Ipswich lakah inkhel an thunun thei lo a, goal chance insiam an harsat a, an khelh dan thar an la bel lo. Portman Road-ah point khat chauh an hmuh avangin Man United hi 12-naah an la awm a, club lian ho point thum hmuh ṭhup laia an hmuh ve loh avangin season thara Champions League khelh phak pawh a harsa dawn.
Bul ṭan ṭha
Amorim-a'n rin lawk ang ngeiin defender pathum a chhawr a, Lisandro Martinez a dam hman loh avangin Jonny Evans-a'n bul ṭanin Matthijs de Ligt leh Noussair Mazraoui te nen an inkawp.
Diogo Dalot chu left wing back atan chhawr a ni a, winger Amad Diallo chu right wing back atan hman a ni thung. Defensive midfield-ah Christian Eriksen leh Casemiro te an awm a, tlar hmasa bera Marcus Rashford awmin Alejandro Garnacho leh Bruno Fernandes ten an thlawp.
United-in khelh dan thar an nei dawn tih a chiang nghal a, bul pawh an ṭan ṭha. Ding lam kilah Amad Diallo-a'n chak takin a khalh lut a, box chhungah ball ṭha dah lut zuiin minute hnihna lekah Rashford-a'n a khung. Amorim-a hoten goal tam zawk khung inbeisei mah se an beisei ang ngawtin thil a thleng lo - Ipswich an khel ṭha zawk.
McKenna naute
Amorim hnuaia Man United khelh dan an thlir ṭhup laiin inkhel entuten Man United assistant manager hlui Kieran McKenna hnuaia Ipswich khelh dan an thlir ta zawk.
Ipswich-in tlarhnung aṭangin ball an in pass chhuak thei a, Man United erawhin in pass chhuah an harsat. Team nem zawka ngaih ni mah se McKenna hoten attacking third aṭangin Man United ball inpe chhuak tur an veng ngam a, an muala khel an nih bawk avangin a khel nghet ṭha zawk.
Tractor Boys ho tan kum 21 mi Omari Hutchinson chu game siamtu a ni a, a nung ṭha hle. Tlarhma lamah Rory Delap fapa Liam Delap chuan out and out striker tih tur a rawn pholang a, mah se goal hmaah a vannei lo. Delap hian hnai tak aṭangin first half leh second half-ah a hlah a, goalkeeper Andre Onana-a'n a dang ṭha bawk.
Mahse, Hutchinson erawhin minute 43-naah mawi zetin box pawn aṭangin a hlai lut a, Mazraoui-a'n a tauh kawi bawk avangin goalkeeper Onana tan dan theih a ni lo. Inkhel inhnehtawk takah 1-1 in an inhnehtawk.
Hun a duh dawn
Man United an la insiamṭha mai dawn lo niin a lang a, inkhelh banah manager Ruben Amorim-a'n insawifiahna hun a hmang. Amorim chuan, "First half kan thlir chuan kan player-te khan hlauhthawnna an nei tih in hmu thei ang. Ngaihtuahna an seng nasa lutuk a, ball an chan loh pawhin an awmna tur an ngaihtuah chawp nasa.
"Chutihrualin ni hnih chauh team kimin training kan nei thei a, hun kan nei tlem ve bawk. Ka duh angin an khel thei lo a, mahse an tum. Kan khelh duhnaa khelh an tum a, an duh bawk," tiin a sawi.
Portuguese manager Amorim hian inkhelh banah Bruno Fernandes ball pe chhuak hma lutuk chu a sawisel a, bench aṭanga lut Joshua Zirkzee pawhin cross nang ching tura box chhunga luh dan zir belh a mamawh thu a sawi bawk.
Man United hian coach thar hnuaiah insiamrem an mamawh. November 28, Ningani zan hian FK Bodø/Glimt nen Europa League-ah an inkhel dawn a; December 1, Pathianni zanah Everton an mikhual zui ang.