Conte leh Lukaku an sang zel

Coach leh player inkawprem tak an awm ṭhin - chutiang kan sawi dawn a nih chuan Antonio Conte leh Romelu Lukaku te hi sawi hmaih a thiang lo ang. Napoli chu Serie A table chung berah an awmpui.

Pathianni zan inkhelah Napoli hian striker Lukaku-a goal khat hmangin AS Roma chu 1-0 in an hneh a, league match 13 aṭanga point 29 hmuin a chung berah an awm, anmahni hnaih bertu Inter Milan aiin point khatin an sang.

Champion lai Inter Milan hi zan hmasa lamah an inkhel a, an chak avangin hmahruaitu an ni lailawk. Conte naute hi chak lo ni se la chuan an hmahruaina an hloh ang, mahse point thum hmuin a chung berah an inhlangkai a ni.

Conte-a'n Napoli a enkawl tirh khan thil tum mumal tak a nei, team a din tum danah Lukaku a tel. Chelsea leh Inter Milan tana khel tawh striker hi a hmang thiam hle a, tunah pawh an chakna hnar a ni chho leh mek.

Napoli coach Antonio Conte chuan, "Roma khan player theihna nei sang tak tak an nei a, coach thar an neih avangin an phur bawk. Minute 65 chhung kha chu a khel ṭha zawk kan ni, a dangah kha chuan an khel ṭha zawk ve thung.

"Hun tawp dawn minute 25 chhung vel kha chu min nawr na em em a, goal khung kha an tumruh hle. Mahse, chiai loin kan ding khawng thei tlat a, a tawpah point thum hlu tak kan hlawh chhuak," tiin a sawi.

Chak lo mah se Roma tan lawmna tur a awm, coach thar Claudio Ranieri enkawlna hnuaiah beiseina an nei tih a takin an lantir a, an inkhel a hmuhnawm bawk; goal an khung loh avang erawh chuan an ui khawp ang.

Roma manager Ranieri chuan, "Kan khingpuite kha Serie A champion tum ngam, table chungsanga awm lai an nih avangin kan tan chuan a awlsam lo a ni. Churihrualin, team ṭha laka kan khelh dan khan min tilawm, zawimuanga hmasawn kan tum ang," tiin a sawi.