Real an chak - nomawi an beisei zel
Inrinni zan khan Celta Vigo khelmualah Barcelona an chak zo lo a, 2-2 in an inhnehtawk - an league match hnuhnung pahnih aṭangin point khat chiah an hlawh chhuak a, hei hi remchangah lak tumin Real Madrid-in an um ve zel.
Pathianni zan khan La Liga inkhelah Real Madrid hi inlanin, an mikhualna ramah Leganes chu 3-0 in an hneh. Spanish champion hian point li chauhin Barcelona an thlau ta a, match khatin an khel tlem zawk tih hriat tel a ṭha.
Real tan tun hnaia goal an khung theih loh avanga sawisel hlawh Kylian Mbappé leh Jude Bellingham ten goal an khung ve leh ta a, Federico Valverde chuan goal khat a thawh bawk. Mualneitu Leganes-in a chhanletna tur an nei lo.
Mbappe & Bellingham
Real-in Mbappe an neih hnuah Bellingham a vul lo sawta sawi a ni a, hmeh bel tur tingin English midfielder hian tun season-ah goal khung a harsat a, Paris Saint Germain aṭanga lakluh Mbappe lahin French club tana a khelh angin a khel chhuak thei meuh lo.
Mahse, Pathianni zanah Real buaina langsar chu chinfelin a awm a, inelna hrang hrangah match li zet a zawna goal a khung loh hnuin Mbappe chuan hmahruaina goal a khung - French striker goal khung hi minute 43-na a ni a, tun season-a match 17 a khelha goal kua a khungna chiah a ni.
Minute 66-naah Valverde-a'n belhchhah ve lehin, hun tawp nan minute nga chiah a awm tawh tihah Jude Bellingham chuan a khung bawk - season hmasa inelna hrang hranga goal 23 khungtu Bellingham tan tun season-a goal hnih a khungna chiah a ni a, a inringtawk sawt ang.
Real & hmabak
Mbappe-a'n goal a khung ve leh ta a, coach Carlo Ancelotti a lawm hle. Italian manager chuan, "Striker-te khelh dan kan thlak kual hret - Mbappe hi a chhung ringawta awm loin, a sir lamah a tal ve ta hret a, Vinicius a lut ta hret thung. Inkhel kan thunun hle," a ti.
King Carlo tan chuan Champions League-a Liverpool an hmachhawn hma lawka a striker pahnih inkawp fuh hi a lawmawm viau ang tih a chiang a, lawmna belhchhah turin Bellingham-a'n goal a khung ve leh ta bawk.
Mbappe vanneih zan ni se, goal tam zawk khung thei a ni - mahse, a goal khung hmasak chu pawmsak a ni lo a, a goal hnihna khungna remchang a neih pawh Leganes keeper Marko Dmitrovic chuan ṭha takin a dansak. Rawlthar duhawm Arda Guler-a chance hlah pawh uiawm tak a ni.