India team-ah Mizo pali an tel

Taekwondo Poomsae inelnaah sang ber World Taekwondo Poomsae Championship chu November 30 – December 4, 2024 chhung hian Hongkong-ah buatsaih a ni dawn a. Championship-ah hian India team-ah Mizo pali an awm.

India aiawh tur Mizo player-te hi Lalthlamuanpuia, Venghlui; H. Vanlalfela, Armed Veng South; Pansy Rampanzeli, Chaltlang leh Ruthi Zainunsiami, Ramhlun Venglai te an ni.

World Championship hi inelna chi hnih - regular poomsae leh freestyle poomsae a ṭhen a ni a, Mizo player-te hi regular poomsae-ah vek an khel dawn a. Lalthlamuanpuia leh H. Vanlalfela te hi senior regular poomsae Under 30 team event-ah an khel dun dawn a ni.

H. Vanlalfela hi freestyle poomsae individual-ah gold medal lain India aiawh thei tho a ni a. Mahse regular team poomsae lama inpumpek a thlang ta zawk a ni. Pansy Rampanzeli hi junior individual regular poomsae a khel tur a ni thung. Ruthi Zainunsiami hi senior under 50 regular poomsae-ah a khel dawn bawk.

India Team-a tel tur hian selection hrang hrang an paltlang. National Championship-a an champion hnuin Champion of Champions(CoC) Zone hrang hrang a mite nen Nasik, Maharastra-ah CoC Final Round an khel leh a. Hetah hian an category ṭheuhah Champions lehin camp tura koh niin, India Camp-ah hian CoC silver medalist te nen koh niin, performance a

aṭangin India team tur hi an thlang fel ta a ni.

Hongkong World Taekwondo Poomsae Championship vawi 13-naah hian ram 77 aṭangin infiammi 2000 chuang an inel dawn a. Cadet, Junior leh Senior Category hrang hrang Individual, Pair leh Team ah te an inel ang a. Inelna mit la tak mai Freestyle Poomsae pawh neih a ni dawn bawk a ni.