Nakkumah Olympic a awm ngei ang - Olympic minister

Japan Olympic minister Seiko Hashimoto chuan nakkumah Olympic an kaltlangpui ngei tur thu a sawi chiang a, harsatna hrang hrang thleng thei mah se a paltlang dan tur kawng an dap tur thu a sawi tel bawk.

Tokyo Olympic 2020 hi kumin nipui laia neih tur a ni a, mahse Covid-19 vangin an nei thei lo - nakkum atan sawn hlat a ni. International Olympic Committee leh Japan inrem dan chuan nakkum nipui zawh hmaa neih tur a ni a, an nei thei lo a nih chuan a hun sawn hlat a ni tawh lo ang.

Japan Olympic minister Seiko Hashimoto chuan, "Eng pawh ni se Olympic hi kan thleng ngei tur a ni. Coronavirus hi reh hman lo mah se a thunun dan leh enkawl dan chu ka ngaihtuah ang, theihtawp kan chhuah dawn a ni," tiin a sawi.

Tun kar tir lam khan OIC chuan Olympic chu Covid-19 a reh emaw, a reh lo emaw pawh ni se neih ngei an tum thu a tichiang tawh. Japan lamin kaltlang pui ngei an duh bawk avangin nakkum nipui laiin infiamna khawmpui lian a awm ngei a rinawm ta hle.

Tokyo 2020 chief executive Toshiro Muto pawhin Olympic chu samkhai leh awlsam zawng an zawn ngawt loh tur thu a lo sawi tawh, hri leng karah pawh tun hma lama an lo ruahman sa tawh anga kaltlang pui theih ngei an duh.

Infiamna khawmpui lian hi a hming atan Tokyo Olympic 2020 tih a ni a, kuminah nei thei loin nakkumah nei pawh ni se a hming pangngai hi a pu tlang ang. Infiamna peng ṭhenkatah inlan tur chiang tawh mah se ṭhenkhatah erawh qualifying an la khel mek.

Mizo rawlthar ritchawi chak Jeremy Lalrinnunga chu qualifier khel lai a ni a, kalphung an thlak danglam hlawk a nih ngawt loh chuan Youth Olympic gold medalist hi senior huangah a inlan phak ngei a rinawm.

Lalremsiami Hmar telna India hmeichhe hockey team pawh Olympic khel tur hian an tling tawh. Kolasib nula hi Inda team tan player pawimawh zinga mi a ni phak a, hliam emaw mimal thila harsatna lian tak emaw a nei a nih loh chuan Japan khawpuiah a inkhel ang.

Tokyo Olympic-ah hian ram hrang hrang 206 aṭangin infiammi 11,091 tel tura ngaih an ni a, infiamna peng 339-ah inelna an nei dawn a ni.