La Liga-in ISL puih an inhuam

European football-a league ngaihven hlawh ber pawl La Liga chuan Spanish club-te Indian football-a an inrawlh theih nan inbiakna kalpui mek a nih thu an sawi a, La Liga India managing director Jose Antonio Cachaza chuan, "Indian football-in hma a sawn zel avangin he hmuna hnathawka tel ve hi a pawimawh a ni," a ti. 

ISL-ah Spanish player engemawzat an awm a, champion lai ATK coach Antonio Lopez Habas chu Spanish niin Bengaluru coach Carles Cuadrat, FC Goa coach Juan Ferrando, Hyderabad FC coach Manuel Marquez Roca, Kerala Blasters boss Kibu Vicuna, Mumbai City boss Sergio Lobera leh NorthEast United coach Gerard Nus-te pawh Spain mi vek an ni. 

East Bengal-in coach thar an la neih loh avangin club 10 dang coach zinga pasarih chu Spanish tihna a ni a, Chennaiyin boss Csaba Laszlo hi Romanian niin Jamshedpur FC boss Owen Coyle leh Odisha FC boss Stuart Baxter te chu Scottish coach an ni thung. 

Cachaza chuan sawi zawmin, "India hian a dik zawngin ke a pen mek a, European ram te kalphung nen chuan a inang kher lo a ni mai thei - mahse kawng dik an zawh a ni. Chu chu hmuh theihin a awm a, naupangte an inkhel ṭan a, national team-in nasa takin hma an sawn bawk," a ti. 

Indian Super League hi November 21-ah khelh ṭan a ni dawn a, ruahman dan chuan October 1-10 inkarah club-te chu pre-season nei tura beisei an ni a, September 25-30 inkarah club-te chu inelna neihna hmun tur Goa thleng tura beisei an ni.