Isak-a'n ISL-a a match 50-na goal nen a lawm

Thawhṭanni zan Indian Super League inkhelah Odisha FC chuan 6-0 ngawtin Hyderabad an sawp a, he inkhelah hian Mizo tlangval pahnih, Isak Vanlalruatfela leh K. Lalṭhathanga (Puitea) ten goal khat ve ve an khung.

Isak-a tan zan chhinchhiah tlak bik a ni - ISL-a match 50 a khelhna chiah a ni a, goal nen a lawm. Mizo tlangval pahnih bakah hian Diego Mauricio, Mourtada Fall leh Rahim Ali ten goal khat ṭheuh an khung bawk a, Hyderabad lamin a chhanletna tur an neih loh avangin Odisha lakah dawl zawrin an zawr.

Odisha goal khung pakhat hi Jerry Mawihmingthanga khung niin a lang a, Hyderabad keeper Lalbiakhlua Jongte 'own goal' angin record a ni thung.

Sergio Lobera enkawl Odisha tan tun season-a an chak vawi thumna chiah a ni a, table-ah palinaah an invawrh chho zui - Hyderabad erawh a mawng lamah an awm chhunzawm zel a, team 13 inelna ISL-ah 11-na an ni mek.

Goal a sur

Odisha hian Hyderabad lakah minute 12-na aṭangin goal an khung ṭan - Hyderabad tlarhnung buai nuai karah a awmna tur taka awm Isak-a'n goal hmahruai a khung a, goal nen ISL-a a match 50-na a lawm.

Minute 30-na a ni a, Odisha bawkin goal an khung nawn. Hyderabad player ball inpek sual chu Puitea'n ṭha taka um lutin, Mizo tlangval Lalbiakhlua Jongte goal venah a pet a, Lunglei keeper hian a lo dang.

Mahse, Biaka'n a dang per hret a, a per lehlam chu Diego Mauricio-a'n goal-ah a chantir. Goal dang lut loin chawlhlawk hman a ni a, second half-ah pawh thawnthu a danglam lo.

Minute 51-naah mual sir aṭanga Isaka ball thlawh luh chuan bar perin, a per lehlam hi Jerry Mawia chuan goal-ah a lo chantir a, 3-0 a ni - Jerry hian ball hi a tlawh a, Biaka hnungah ball hi tlain, goal-ah a lut zui a ni.

A la tawk lo

Jerry-a goal khung hnu lawkah Isaka hian goal khung theihna remchang dang a nei - mahse, Thingsulthliah/Bawngkawn tlangval a vannei tawk lo a, a 'shot' chuan post chhung lam a per hnuah Hyderabad tlarhnung lamin an chingfel hman.

Mahse, Odisha an la duhtawk chuang lo. Moroccan midfielder Ahmed Jahouh leh Isaka ten ball an inpek kual hnuah, Jahouh hian ven loha awm Fall chu hmu fuhin ball a thlawh lut a, Senegalese defender tan goal-a chantir turin harsatna a awm lo.

Minute 75-naah Puitea hun a her chhuak a, Bethlehem Vengthlang midfielder hian Mauricio siamsak chu penalty box chhungah duhthala hmun awl nei chungin goal-ah a chantir a, Mizo midfielder tan ISL-a a goal thumna chiah a ni.

Odisha an phur laklawh - hun tawp nan minute khat chiah a awm tawh tihah Rahim Ali chuan a khung ve leh a, goal dang lut tawh loin, 6-0 in Odisha an chak.

A 50-na

Aizawl FC forward hlui Isak-a'n ISL-ah match 50 a khel tling ta a, goal nen a lawm - tun season-a a goal khung hmasak ber a ni bawk a, ISL-ah hian goal riat khung tawhin, vawi ruk assist a nei tawh.

Isaka hian 2020-21 season aṭangin ISL a khel ṭan a, a season hmasa berah hian minute 29 bak khelmualah hun a hmang lo. 2021-22-ah a season hnihna hmangin match nga a khel a, ISL-a a goal hmasa ber a khung bawk.

ISL-a a season thumna a hman meuh chuan Isak hian match 10 a khel tling a, goal hnih khungin assist vawi hnih a nei a, a puitling tawlh tawlh - season hmasaah phei kha chuan match 24 ngawt khelin goal li a khung a, assist vawi thum a nei.

Tun season-ah pawh match kua an khelh zawng zawngah bul a ṭan vek a, goal khat khungin, assist vawi khat a nei - khelmualah minute 727 hun a hmang tawh.

Isaka lawmna

Odisha forward Isaka chuan, "ISL-a ka match 50-na tur tih pawh ka lo hre lo a, inkhelh dawn khan ka hre ve chauh - tun season-ah kan vanduai leh ṭhin a, tunah chuan kan vannei ve ta," tiin Vanglaini a hrilh.

Isaka chuan sawi zawmin, "Match 50 ka khel ve ta reng a, mahse, heti zat match khel hi an tam tawh lutuk. Hmabak a la tam a, ṭan mar zel a la ngai - goal khung hi chu tupawhin kan châk vek.

"Mahse, ka hun a la thleng lo a ni ang, tiin ka inhnem zel a, kan hun a lo thlen hun hi dawhthei taka nghah a, inthlahdah phah lo a, theihtawp chhuaha beih zel hi a lo ngai ber a nih hi," a ti.

Thawhṭanni zan inkhelah hian Odisha tan Isak, Puitea leh Jerry bakah Jerry Lalrinzuala chuan inkhel bul a ṭan a, Hyderabad lamah keeper Biaka bakah Ramhlunchhunga'n inkhel bul a ṭan.