Inter Village Football : Bawngkawn, Armed Veng leh College Veng an dingchang

G.I.G Motors MFA All Mizoram Inter Village Football Championship 2024-ah team ṭha Bawngkawn, Armed Veng leh College Veng ten last 16 an lut.

Inkhel ngaihven hlawhah Lalrindika Hmar enkawl Bawngkawnin Lalbiaksanga Colney enkawl Armed Veng South 2-1 in an hneh. Inkhel dangah Armed Veng leh College Veng ten 1-0 ve vein Chaltlang Lily Veng leh Lungdai an hneh bawk.

Armed Veng an vannei

Armed Vengin an mualah Chaltlang Lily Veng an hmachhawn a, awlsam taka chak mai tura ngaih an ni. Mahse, Lalramchullova enkawl Armed Veng tan chak a awlsam lo.

Inkhelh ṭantirh lamah team pahnih an inhnehtawk a, Lalawmpuia Hnamte chu Armed Veng tana danglamna thlentu a ni. Minute 41-naah Opitea hian box pawn aṭangin goal-ah a pet a, goalkeeper hmaah sawtin mak takin goal-ah a lut - Lily Veng keeper a chesual.

Second half-ah Armed Vengin defender Vanlalduatsanga an chhawr theih tawh loh avangin an buai phah a, goal mamawh Chaltlang Lily Vengin goal an nawr na bawk. Mahse, goalkeeper Andrew Lalhmingliana tawnhriat neih ṭhat zarah Armed Veng an ṭang tluan.

Danmawia a 'cial'

Lungdaiin College Veng lakah game ṭha nen bul an ṭan a, goal chance pawh an ngah zawk. Mahse, Dennis Laltleipuia finishing a ṭha tawk lo a, second half-ah Lalsiamthara'n goal ban a pet a per bawk.

Chutihrualin inkhel chawhnu lamah erawh College Veng an che ṭha zawk a, tlarhnung tiphuitu Zothanmawia (T. Mawia) pawhin woodwork a tih per a, team tan a ṭangkai hle.

Minute 89-naah player ṭha bik danglamna a lang a, R. Laldanmawia'n a thiam thil a la theihnghilh lo. Lungdai tlarhnung an muthlu a, Danmawia erawh a rilru a fim - box chhung aṭangin ṭha zetin College Veng chakna goal a khung.

Bawngkawn an chak

Bawngkawn leh Armed Veng South inkhelin ngaihven a hlawh a, beisei lawk ang ngeiin a hmuhnawm bawk. AVS an chesual a, minute hnihna lekah left back Tezawka'n tlarhnungah a pass sual a, Bawngkawn striker K Lalremmuana'n chang fuhin kawh zetin a pet goal.

Bawngkawnin goal an khung hma avangin inrintawkna an ngah sawt a, midfield-ah captain Zonunmawia a la ṭangkai hle. Zonuna hian ball a sem ṭhat bakah crossbar a pet per bawk.

Armed Veng South insiamrem mah se goalkeeper Lalthlamuanpuia tan harstna an siam thei meuh lo. Goal hmaah Bawngkawn an hlauhawm ve reng a, AVS tan keeper R. Malsawmkima a khel ṭhat zarah chak beiseina an nei zel.

Mahse, minute 56-naah Bawngkawnin AVS tihsual hmang ṭangkaiin an vaw let a, Lalpekhlua'n halfway line aṭanga khalh pheiin amah umtu C. Ramdinmawia'n dan tumin box chhung thleng veng mah se a ball pet a dang hman lo a, keeper Mana pawhin a dang thei chuang lo. Peka goal ropui zarah Bawngkawn dinhmun a ṭha.

Ṭantu nei ṭha Armed Veng South-in tha an thlah lo a, an nawr chhunzawm ve zel. Corner kick aṭanga an chance neih chu Lalhriatpuia leh Lalhmangihsanga ten an hmang ṭangkai thei lo. Mahse, minute 75-naah Lalnunsanga'n (Talea) box chhung aṭangin a pet kul pawp a, Bawngkawn keeper Thlamuanpuia tan dan ngaihna awm lo.

Inkhel a nung thar a, AVS lamin nawr chhunzawm zelin Talea chance ṭha dang a hlah. Coach Lalrindika Hmar hnuaia khel Bawngkawn an ṭang tluan a, goal dang an chhuah lo. Bawngkawnin last 16-ah Farkawn leh Zembawk North chak zawk zawk an hmachhawn ang.