De Bruyne hma hun a chiang lo

Kevin de Bruyne-a'n tuna a contract neih lai chu a pawtsei dawn em, tih a sawi chiang thei lo - Manchester City midfielder hian nipui bazar inhawn hunah club dang a zawm a nih pawhin a mak lo ang.

Belgian midfielder hi kum 33 mi a ni tawh a, a contract neih lai hi tun season tawp ruala zo tur a ni. September thla aṭang khan malpui hliam vangin a buai a, season hmasa khan hliam avang bawkin hun rei tak chhung a lo chawl tawh bawk.

A vanglai a liam ve mek a, hliamin a tlakbuak fo ta bawk - Man City chuan De Bruyne chungchangah hian thuchhuah an la nei lem lo, contract chungchanga inbiakna chuan hma a sawn rih lem lo niin a lang.

City thiampuipa De Bruyne chuan, "Season kan hman tirh kha chuan hmathlir tam tak ka nei, a hmasa berah chuan ṭha taka inkhelh phawt kha a ni a, chumi bakah chuan contarct chungchang pawh a tel.

"Mahse, Brentford nen kan inkhelh ṭumin ka hliam a, contract chungchang chu kan sawi chhunzawm thei ta rih lo. Hun rei lote chawl mai turah ka inngai a, mahse chawlhkar riat aṭanga chawlhkar kua lai a lo ngai ta si.

"Tuna ka duh ber mai chu ṭha taka football khelh theih a ni a, thil dang chu a hnua lo thleng tur a ni. Season tharah khawi hmunah nge ka awm dawn tih sawi a la hun lo, sawi theih pawh a la ni hek lo.

"Ṭha taka inkhelh theih ka duhin ka chak em em a, chumi chu ka thil tum hmasa ber pawh a ni," a ti. De Bruyne hian ball a pet leh thei tawh a, ngaiawh leh tur erawh chuan hun a la mamawh deuh dawn a ni.