West Ham lakah Magpies an tlawm
Tomas Soucek leh Aaron Wan-Bissaka te goal khung hmangin West Ham United chuan khualmualah Newcastle United chu 2-0 in an hneh a, an tiatpui team lak aṭangin point thum hlu tak an hlawh chhuak.
Thawhṭanni zan khan Premier League inkhel pakhat awmin St. James' Park-ah mipui 52,094 an pungkhawm. Ban mai theih dinhmuna ding Julen Lopetegui-a'n a naute a chak pui avangin a dinhmun pawh a ziaawm leh phah deuh tura ngaih a ni.
Spanish manager Lopetegui hian nipui lai khan David Moyes-a thlak a, beisei angin a hun tir lam a hmang lo. Hmmers a kaihhruaina match hmasa 11 aṭangin vawi thum chiah an chak.
An result a ṭhat loh avangin khawthlang chanchinbu mite chuan Lopetegui hi a dinhmun a derthawng chho hle niin an sawi. Mahse, khualmualah goal hnih khungin anmahni goal an venghim thei a, an tan result ṭha bik a ni ngei ang.
Magpies hian goal khung theihna remchang an insiam ve tho - Jean-Clair Todibo-a ball pet chhuah fuh tawk loh vangin Anthony Gordon chuan remchang a hmu a, mahse goalkeeper Lukasz Fabianski a paltlang thei lo.
Newcastle United striker Alexander Isak pawhin hun ṭha a nei, amaherawhchu Isak-a pawhin Bruno Guimaraes-a ball pek ṭha tak mai chu goal atan a chantir thei lo, goal ban hrulah a pet chhuak.
Spain, Real Madrid leh Wolverhampton Wanderers enkawl tawhtu Lopetegui chuan, "Team ṭha tak lakah hnehna chan phu zawk khawpin kan khel chhuak thei a, kan tan chuan result duhawm tak a ni, inkhel pumpui thlir khan chak kan phu zawk.
"Magpies laka kan rilru put ang hi pu chhunzawm thei ila a duhawm hle, ka naute hian theihna chu an nei sang, chumi chu inringtawk taka an hmang chhuak a nih chuan team ṭha hneh turin kan ṭha tawk," a ti.
West Ham hian Premier League match 12 aṭangin point 15 an hmu a, an hneh tak Newcastle United hian khelh zat inangah point 18 an hmu thung - match khat lekah an la inumphak thei reng tihna a ni a, insiamṭhat nan khua a la tlai lo.
Newcastle manager Eddie Howe chuan, "Gordon bakah khan Joe Willock, Sean Longstaff leh Alexander Isak te kha an vanneih ṭum chu ni se la, goal khung thei tur vek an ni. Mahse tun ṭum chu kan tan hun ṭha lo," tiin an vanduai thu a sawi.