Djokovic leh Murray thawkdun dawn

Tennis season tharah thil danglam tak kan hmu dawn, world number 1 hlui Andy Murray chu player ni loin coach a ni tawh dawn a, a player enkawl tur chu Novak Djokovic a ni ang.

Murray leh Djokovic te hi an inkhel dun hman viau a, hliam vangin British tlangval Murray hi a inkhel rei thei ta lo. Tennis khel tawh lo mah se player enkawl lamah tha a thawh zui nghal dawn tihna a ni.

Grand Slam vawi 24 champion tawh Djokovic chuan, "Player tam tam nen inelna ka hmachhawn tawh a, ka elpui hautak leh ropui berte zinga mi nen kan thawkdun tur hi thil lawmawm tak a ni chiang hle.

"Season thar min ti nghakhlel hle a, a bik takin Andy nen Australian Open kan hmachhawn dun tur hian min ti phur hle a ni," tiin a sawi a, an pahnih tan Australian Open hi thil thar a ni dawn lo.

Djokovic hi Australian Open champion tam ber a ni a, nomawi a chawina kawngah Andy Murray hi kum 2011, 2013, 2015 leh 2016 final-ah te khan a lo hneh tawh a ni.

Murray chuan, "Novak hian thil tum sang leh ropui tak a nei a, chumi ti hlawhtling tura ka beih pui thei tur hian min ti phur a, ka nghakhlel takzet a ni," tiin a sawi ve bawk.