Quarterfinal a hmuhnawm

Zudio LPS Pro Fight chu Thawhṭanni zan khan khelh ṭan a ni a, inhneh a hmuhnawm vek - nizan khan khelh chhunzawm niin, zanin hian quarterfinal bik chu khelh zawh a ni ang.

Pro Fight hi LPS Arena, falkland Vengah neih ṭhin a ni a, a hmuna en duh tan a kal theih. TV leh YouTube aṭanga en theih a ni bawk.

Bantamweight: Omega Lalramdina'n ban sei zawk a nihna a chhawr viau, a khingpui Gregor Joseph nen mahni inveng chunga khingpui hnek chi an ni. Round hnihna aṭangin East Kulikawn boxer-in a hnek chhuak tam a, in hnek inhnehtawk takah a dingchang hram.

Lightweight: Pro Fight kal meka boruak nei lian tak Lalruatmawia chuan Vanzairemmawia lakah zahngaihna a lantir lo. Kum 20 mi Ruatmawia hian boxing inelna a hmachhawn vawi khatna ni mah se a mikhual lo, a kut a rangin a hnek chhuak tam thei hle.

Middleweight: John Lalruatsanga chuan Pro Fight-a a tel vawi khatnaah semifinal a lut ta, boxing inelna danga tawn hriat a neih tawh bakah hnek thui zawk a nihna chhawr a, kum upa leh thahruai ngah zawk a nihna chu Lalhriattira laka a chungnunna a ni.

Middleweight: Champion kawnghren hren a tumna kawngah F. Lalthanliana'n rahbi tuk sang zelin round khat hmang tluan lo in Cleason Lalrawngbawla a hneh a, vawi hnih a khelh tawhah harsatna lian a la tawk lo.

Flyweight: Nikum flyweight title fight-ah NT Lalbiakkima a hneh loh aṭangin Vanlalenkawltira'n champion a tum ruh zual a, a thiamna leh theihna tuai hriamin Mualcheng South rawlthar beiseiawm Dolrich Zothansanga lakah round thum a la vek.

Welterweight: Seeded zinga mi Venghlui boxer Zoremsanga'n a khingpui R. Lallawmmawia Duhlian lakah inhnek a thunun a, hnek thui zawk a nihna thiam taka a lantir bakah inhnaih chilhah hnek dan hmang tam leh hnek dik zawk a ni bawk a, hnehna a chang.

Welterweight: Light title kalsanin welter-ah 2015 bantam champion HC Lalramfela'n a insawn a, Pro Fight-a a tel hnuhnun ber turah a kaltluang rih hle, weight hrang pathuma champion hmasa ber ni thei turin a kalkawnga ding Lalremruata chu a hneh.