Ronaldo hoin Al Nassr an chak

Thawhṭanni zan khan AFC Champions League Elite khelh niin Al Nassr chuan Al Gharafa chu 3-1 in an hneh a, inkhelah hian Cristiano Ronaldo chuan goal hnih khungin an chak theih chhan langsar a ni.

Al Bayt Stadium-a inkhelah Ronaldo hian a goal khatna chu sang taka zuang chungin a tauh lut a, goal hnihna khung tur pawhin awm hmun a tlan dik bakah amah vengtu a bum hmasa bawk.

Al Nassr hian match nga aṭangin point 13 an hmu a, team 12 awmna group B-ah pahnihna an ni mek, an chungah hian point 15 hmutu Al-Ahli Saudi an awm mek a ni.

Portuguese forward hian kum 40 hnaih tawh mah se goal khung a la bansan thei lo - kum 30 a tlin chinah ringawt pawh goal 450 a khung tling tawh a, football a khelh hun chhungin goal 913 tehmeuh a khung tling tawh bawk.