Football dinhmun a la ṭha lo - ECA Chairman

European football-a club hrang hrang intelkhawm pawl European Club Association chairman Andrea Agnelli chuan football khawvel dinhmun a la chhiat thu a sawi a, "Ka ngaihdan chuan club-te hi dinhmun chhe takah kan la ding mek a ni," a ti.

Covid-19 vangin European football tam tak chu tihtawp a ni a, league tam tak chawlh lailawk niin khelh chhunzawm ni mah se entu awm loa khelh an nih hlawm avangin a hma an phak thei lo a, ticket hralhna aṭanga an sum hmuh ṭhin tam tak chu hmuh tur an nei tawh lo. 

Juventus chairman ni bawk Agnelli chuan, "Khawvel hmun hrang hranga confederation tam takin an hloh aia tam hi club ṭhenkhat chuan an hloh ka ring a, he hun harsa tak avang hian club tam zawkin an tawrh chhunzawm zel dawn a ni," a ti. 

Agnelli hian heng thu hi European Club Association-in general assembly an neihnaa a sawi a ni a, hetihlai hian European football-a thuneitu sang ber UEFA president Aleksander Ceferin chuan UEFA Super Cup-ah entu mipui 20,000 an awm theih tur thu a sawi thung. 

UEFA Super Cup hi September 24-ah khelh a ni dawn a, Champions League nomawi chawitu Bayern Munich leh Europa League champion Sevilla-ten Super Cup champion nih an inchuh ang. 

Ceferin chuan, "Kum tirah khan kan thil tawn turte hi tuin nge hre lawk bik ang? Thla ruk liam taah kha chuan engkim kha a tawp a, tunah chuan ka ṭhian, kan lo kir leh tak hi. Engkim a pangngai vek tawh kan ti thei lo a, mahse a pangngai thuai ang," a ti. 

Mahse, UEFA President thusawi hi Agnelli chuan a ṭawmpui ve lo a, European football-a thuneitu sang ber UEFA chuan international club competition aṭang ringawtin pound maktaduai 519-a hloh tur thu a sawi.