Semifinal-ah Zverev a lut

US Open boruak inlumlet vel a ngaihnawm, final khelh a nih hma aṭangin champion nih tuma intlansiak boruak a sang nghal. Thawhlehni zan khan Alexander Zverev chuan Borna Coric 1-6, 7-6 (7-5), 7-6 (7-1), 6-3 a hnehin semifinal a lut.

Quarterfinal inkhel dangah Pablo Carreno Busta chuan Denis Shapovalov 3-6, 7-6 (7-5), 7-6 (7-4), 0-6, 6-3 in a hneh ve bawk. Zverev leh Carreno Busta te hian final luh an inchuh leh dawn, player pahnih hi Grand Slam final la lut ngai lo ve ve an ni.

Alexander Zverev leh Borna Coric te hi tun hmain vawi li an lo inkhel tawh, record nei ṭha zawk Coric-a'n ṭum thum hnehna a chang tawh - an intawn tawhna zingah 2017 US Open kha telin Croatian tlangvalin hnehna 

a chang.

Flushing Meadows, New York-ah an intawng leh a, seeded 27-na Coric zawk che fuh hmasa lehin game khat chauh hloh chungin set khatna a la. German tlangval a talbuai a, chak lo tura ngaih a ni.

Mahse, set hnihna aṭangin seeded pangana Zverev a rawn tho chhuak; Australian Open 2020 semifinalist hian tie break hmanga set hnih a lak hnuah harsa lutuk loin set lina a la zui a, darkar thum leh minute 25 chhungin hnehna a chang let.

ATP Finals nomawi chawi tawh Zverev chuan, "A tir lamah khan na taka nawr ka tum a, ka tum angin ka khel lo. Ka khelh dan kha Grand Slam quarterfinal-a khelh dan tur a ni lo tih ka hria a, chiai loin ka insiamṭha thei kha ka vannei," a ti.

Kum 23 mi Zverev hi player ṭha leh beiseiawm a ni, mahse inelna lianah a talbuai ṭhin. Kuminah hma a sawn hret a, January thla khan Melbourne Park-ah semifinal a lut, New York khawpuiah a thiam pali zinga a tel leh tak avangin final thlen a beisei sang ang.

German tlangval, 6 ft 6 in zeta sang hian service a nei ṭha tawk a, a ball vuak a na. Tournament lian a khelh tawha a buaina ṭhin chu 'cool' huna a cool thei lo ṭhin hi a ni, dawhthei leh thinnel taka a khel zui a nih chuan nomawi chawi turin theihna a nei.

Nimin zing inkhel ṭan hma khan seeded 20-na Carreno Busta hi a khingpui seeded 12-na Shapovalov rinkai lo zawk a ni. Mahse darkar li leh minute riat zet an inkhelh hnuah 2017 US Open semifinalist Busta a dingchang.

Carreno Busta chuan, "Ka khingpui Shapovalov kha a ball vuak a na em em a, lo vuak let chu sawi loh lo dan hman ringawt pawh a harsat chang a awm. Mahse baseline lama vuak phei tam kha ka himna tur a ni tih ka hria, rilru fim tak chunga ruahmanna ka neih theih avanga chak ka ni," a ti.

Canadian tlangval Shapovalov-a'n vawi 76 ngawt mai winners a vaw chhuak thei a, mahse double faults vawi 11 a nei thung. Shapovalov-a'n a khingpui service pawh chhuhsak hnem zawk mah se hun pawimawh laia che fuh kauh ṭhin Carreno Busta a chak.