Ronaldo-a'n century a siam

Cristiano Ronaldo-a'n Thawhlehni zan khan Sweden lamah ropui zetin goal hnih a khung a, Portugal 2-0 in an chak. Juventus star hian ram tan goal 101 a khung tling ta a, Europe bikah ram tana goal khung tam ber a ni.

Friends Arena-ah Sweden-in Por-tugal an mikhual a, minute 44-naah ṭul lo takin Gustav Svensson-a'n Bruno Fernandes a tlawh a, yellow card a hmuh tawh avangin Svesson hi hnawhchhuah a ni.

Freekick pet turin Ronaldo a rawn ding chhuak a, yard 25 aṭangin goal ropui a khung. Real Madrid forward hlui hi kum 35 mi a ni tawh a, a thiam dan a la ngai reng.

Player 10 lakah Portugal an chung-nung a, Manchester United midfielder Bruno Fernandes chu team tan a ṭangkai a, rawlthar duhawm Joao Felix pawh goal hmaah a hlauhawm bawk.

Amaherawhchu a tawp khartu chu Ronaldo bawk a ni a, Juventus forward hian box pawn aṭangin minute 72-naah goal ropui a khung nawn. Minute 81-naah Ronaldo thlak a ni a, goal dang hmuh tur a awm tawh lo.

Europe-ah Ronaldo elpha an awm lo, Portugal captain hian 2018 World Cup-ah Spain lakah hattrick siamin Ferenc Puskas-a record goal 84 a nih rual. Morocco lamah goal khung zuiin Europe-a goal khung tam ber record hi June 2018 khan a nei tawh.

Manchester United forward hlui hian goal a khung chhunzawm zel a, tunah chuan goal 101 khung tawhin ram tana goal khung tamah Iran striker Ali Daei goal khung zat goal 109 chiah a tluk tawh lo.

Ronaldo hian a taksa a vawn ṭhat rah a seng a, a record hi a elpui ber Lionel Messi tan khum theih a nih a rinawm tawh loh. Barcelona star hian Argentina tan goal 70 a khung a, kum 33 mi a nih tawh avangin ram tan hun a nei tam tawh lo.

Player ropui dang Pele leh Maradona te khan ram tan goal 77 leh goal 34 an khung a, an goal khung zat belhkhawm hi goal 111 niin Ronaldo hian a la tlin theih mai a rinawm.

Portugal captain chuan, Ronaldo hian an record hi a khum chiang hle. Sweden lakah goal hnih a khung zawhah Ronaldo chuan, "Mellung pawimawh tak ka thleng thei ka lawm. Goal 100-na leh 101-na kha goal ṭha tak ve ve a ni a, kha khan minti lawm lehzual. Tunah chuan goal 109 khung ka tum ang. Chutihrualin record hi ka ngaih pawimawh ber a ni lo a, a rawn thlen ve mai ka beisei," tiin a sawi.