Jimenez lu an zai

Wolves striker Raul Jimenez-a luruh khi chu zai a ni a, Mexico international hian an zai hlawhtlin thu leh a rang thei ang bera khelmual chhunga a inlan leh theih a beisei thu a sawi chhuak.

Pathianni zan Premier League inkhelah Jimenez hi Arsenal defender David Luiz nen an intauh palh, khelmualah minute 10 vel an buaipui hnuin damdawi inah hruai a ngai a, zai a ngai zui hial a ni.

Kum 27 mi Jimenez chuan, "Min tawrhpuina zawng zawngah lawm-thu ka sawi, enkawl chhunzawm ka ni dawn a, a rang thei ang bera ka inkhelh leh theih ngei pawh ka beisei," tiin twitter lamah a tarlang.

Jimenez hian 2018 khan Benfica aṭangin Wolves hi loan hmangin a zawm a, season khat hnuah an la nghet. Premier League club tan hian inelna hrang hrangah match 110 a khelh aṭangin goal 48 a khung tawh.