Hamilton-a'n hri leng a kai

Formula 1 champion Lewis Hamilton chuan Covid-19 a kai tih hmuh-chhuah a ni a, tun kar tawpa Formula 1 Sakhir Grand Prix an neih turah a inlan thei dawn lo.

Mercedes team thuchhuah tarlan dan chuan, Britain tlangval hi Thawhṭanni tuka a zing tho chu a nuamsam lo a, a dinhmun endik niin tunlai hri leng coronavirus a kai tih an hmu chhuak.

Hamilton hi khung hran niin enkawlna pek nghal a ni a, a dinhmun a ngaihtuahawm hran lo. Mercedes chuan, "Natna tlang lawn bak harsatna a nei lo, a taksa dinhmun pawh a ṭha," an ti.

Kum 35 mi Hamilton hian season a zawh hmain nomawi a kawl lai a humhim tawh. F1 huanga champion hnem ber Michael Schumacher a title neih zat (7 titles) a nihrual tawh - season tharah khum a tum ang.

Tun kar tawpa tlan tur Sakhir Grand Prix bakah hian, season kharna ni turin December 13 hian Abu Dhabi Grand Prix an tlan leh dawn a ni. Driver leh team champion a chian tawh avangin inelna hi a hlut tur angin a hlu tawk thei tawh lo.