Hammers an sang zel

West Ham chuan Angelo Ogbonna leh Jarrod Bowen te goal hmangin Aston Villa 2-1 in an hneh a, point 17 hmuin Premier League table-ah pangana dinhmun an luah.

Aston Villa tan captain Jack Grealish-a'n goal khat a khung ve thung a, hun tawp dawnah Ollie Watkins chuan an si phurh a sut zoah inngai hman mah se VAR hmanga ennawn a nih hnuah a ban chu a lo 'offside' vangin an hnawlsak.

Hammers hian season bul ṭannaah Newcastle an ngam lo, a hnuah erawh Leicester City leh Wolves an hneh bakah Manchester City leh Tottenham Hotspur nen an inhnehtawk a, match 10 khelh chinah tun hnai season kua (9) chhunga an bul ṭan fuh ber ṭum (17 points) an tawng.

West Ham manager David Moyes chuan, "Duhthusamin kan khel chhuak lo, kan khingpui khan harsatna hrang hrang min siamsak hnem hle. Khelh ṭhat tawk loh zanah point thum kan hlawh chhuak hlauh a, a hlu bik hle," tiin a sawi.

Aston Villa manager Dean Smith chuan, "Kan result hi a lawmawm loh, a chang chuan vanneihna hi kan lamah a ṭang lo ṭhin a ni. Kan goal min pawmsak loh kha ka ennawn leh pawhin offside niin ka hre lo," tiin VAR thutluknaah a lawm lo.