Fulham lakah Foxes an tlawm

Premier League hriatthiam a har chhunzawm. Champion tum ngam zinga mi Leicester City chu tlak hlau Fulham lakah 2-1 in an tlawm a, tun hnaia khel ṭha tak West Ham chuan an mikhual Aston Villa 2-1 in an hneh ve bawk.

Thawhṭanni zan inkhelah Fulham an chak avangin Scott Parker naute hi a hniam zual pathum aṭangin an tal chhuak. Foxes erawhin hmahruaitu Tottenham Hotspur nih rual theihna hun ṭha an neih chu an bawhpelh.

King Power Stadium-ah Fulham an che fuh hmasa zawk, mikhual team tan Ademola Lookman chuan minute 30-naah goal hmahruai a khung. Goal luh aṭanga minute riat hnu lekah Ivan Cavaleiro chuan penalty aṭangin a khung belh.

Leicester striker Jamie Vardy-a'n ni dang angin a hun ṭha neih a chhawr ṭangkai thei lo. English player hian hun tawp dawnah Harvey Barnes tan a siamsak a, goal dang an neih belh loh avangin anmahni mualah an tlawm.

Fulham manager Parker chuan, "Beiseina leh rinna kan neih tlat chuan hnehna hi kan chang thei a ni. Tun season chhunga a vawi hnihna atan kan chak ta a, hetiang result hi kan neih chhunzawm theih ka beisei," a ti a, penalty khungtu Cavaleiro a fak bawk.

Cottagers hian tun hnaia penalty an hmuh hnuhnung pathum an hlah - Cavaleiro, Aleksandar Mitrovic leh Lookman ten an hlah vek. Lookman-a'n West Ham laka 'Panenka' hmang a hlah phei chu Parker hian a sawisel hial, tunah erawh goal atan an chantir thei ta.

Champion lai Liverpool leh Brighton an inhnehtawk a, Tottenham leh Chelsea inkhelah goal a lut lo bawk. Leicester hian Fulham hneh ni sela chuan league hmahruaitu an ni thei. Mahse anmahni mualah ngei team nem zawka ngaih an ngam lo.

Rodgers-a naute goal nawr a na tawk lo a, a bik takin striker Vardy chu London club lakah a che thei lo - a tir lam minute 25 chhungin ball vawi khat chauh a khawih. Europa League lamah player ṭha an inlan avangin an chau tih a lang.

Leicester manager Rodgers chuan, "Hun chanve hmalam kha kan khel chhe takzet a ni. Ball kan hloh hnem hle, kan khingpui goal lam kan nawr thei miah lo kha a mak bawk. Fulham khan hnehna chan phu khawpin an khel chhuak thung," a ti.

Foxes hian season hmasa pawh khan bul an ṭan fuh hle - December thlatirah chuan Liverpool leh Manchester City te nen an inel phak hial, a tawpah erawh an zuih. Kuminah bul an ṭan fuh leh a, zuih loa kal tluan an tum tawh ang.