Inter-in Messi lei an tum a, kan hnar - Laporta

Catalan club talbuai mek Barcelona president hlui Joan Laporta chuan Barcelona hotupa a nih lai khan Lionel Messi chu Inter Milan-in euro maktaduai 250-a lakluh an tum thu a sawi a, mahse Italian club dawrna hi an hnawl. 

Messi hi Barca-ah a nghet lo. Nipui transfer khan Catalan club hi chhuahsan a tum a, mahse court thlen a ngaih dawn avangin amah siam liantu club laka thubuai thehluh duh loin a insum. 

Argentine forward hi season zawh rualin Nou Camp-a a contract a tawp tawh dawn a, January-ah hian amah duhtu club dawr ṭan turin zalenna a nei.  

Barcelona-a Messi enkawl thiam bika an sawi ṭhin Pep Guardiola chuan Manchester City-ah kum hnih chhung atan contract thar a ziak a, Etihad Stadium-ah Messi thlem luh a tum dawn nia sawi a awm bawk. 

Messi nena inmil lo Barca president Josep Maria Bartomeu chu October khan a hna aṭangin a chawl tawh a, kum tharah Barcelona hian President thar an nei dawn. Kum 2003-2010 inkara President lo ni tawh Laporta hian chuh ve leh a tum a ni. 

Laporta chuan, "Messi hian chhuah a tum chhan chu an enkawl dana a lawm loh vang a ni. Inthlan hi lo awm hma se chuan tuna kan buaina hi kan tawk kher lo ang. "Messi hian Barca a hmangaih a, a tan leh Barca tana ṭha ber tur ngaihtuah chunga titi ho turin hun ṭha min la pek ka ring tlat. Club dang aṭangin sawmtu chu a nei ngei a, hei chu a nih dan reng a ni. 

"Kum 2006 khan Inter neitu ṭhin Massimo Moratti chuan euro maktaduai 250-a lei min dil a, mahse ka phal lo. Messi leh a chhungte hi Catalonia-ah an hlim a, tuna kan buaina hi sum lam a ni lo. Club zawk hi siamṭhat a ngai a ni. A tana ṭha ber chu President thar tur thlirlawk a ni a, President thar a zirin thutlukna siam rawh se. Sawmna ṭha tak nen chuan Barca-a cham a thlang em em ang.

"Messi hian min hrechiang a, kan hnathawh dan, kan kal dan, engkim a hrechiang. Ka inchhuan vena chu ka thutiam ka sut ngai lo hi a ni a, hei hi Messi chuan tun hmaa kan thawh dun aṭangin a hre tawh," tiin President-a a tlin chuan Messi a cham duh a ring. 

Barcelona hian La Liga-a an match hnuhnung berah Osasuna chu 4-0 in an sawp a, Messi hian an goal hnuhnung ber khungin November 25-a thi Diego Maradona tan a goal khung hi a hlan. 

Catalan club hian zanin dar 1:30-ah Champions League group stage match khel turin Ferencvaros an lenchilh dawn a, an match hmasa paliah hnehna an chan vek avangin last 16 an lut chiang tawh. 

Group G inkhel dangah Juventus chuan zanin dar 1:30-ah Dynamo Kiev an lenchilh dawn bawk a, Cristiano Ronaldo awmna club hian Barca hnuaia point kua neiin last 16 an lut chiang tawh bawk. 

Barcelona nen an intawn ṭuma chak lo Juventus hian Serie A lama an match hnuhnung berah Benevento chu 1-1 in an inhnehtawkpui a, coach Andrea Pirlo chuan Ronaldo a hahdamtir. 

Pirlo hian last 16 lut tawh mah se group hmahruaitu nih a tum niin a lang a, zaninah Ronaldo a chhawr a nih pawhin a mak lo ang. Ronaldo hi Messi nen tun hnaia Globe Soccer's Player of the Century leh Player of the Year award dawng thei tura chhawp zingah an tel.