ATP Finals khelhna tur chu Turin

Mipa tennis thuneitu sang Association of Tennis Professionals (ATP) hnuaia season kharna ATP Finals chu nakkum aṭangin Turin khawpuiah khelh a ni dawn, Italy ramah hian kum 2025 thleng an khel ang.

Italy hmar lama awm Turin hi khawpui changkang leh mi ngaihsan a ni, infiamna an ngainat bakah sakhuana leh sumdawnna pawh a lian hle. Serie A champion Juventus innghahna khawpui a ni bawk.

A thiam zual pariat inelna hi London khawpuia awm 02 Arena chuan season 12 chhung ngawt a thleng tawh a, tunah chuan hmun dangah an khel dawn ta. Turin Deputy Mayor, Commerce and Tourism lam changtu ni bawk Alberto Sacco chuan, "A nuam dawn tih a chiang.

"Khawvela tennis player ṭha leh hnuhnawm tak tak kha kan khawpuiah ngei an inkhel dawn tihna a ni a, khawtual mite tan ennawm kan chhawpchhuah dawn bakah khualzin tam tak kan hip theihna tur a ni," tiin a sawi. Kumin ATP Finals-ah khan Rafael Nadal leh Novak Djokovic ten final an lut phak lo. Russian tlangval Daniil Medvedev chuan Dominic Thiem hnehin tennis a khelh hun chhunga a nomawi hlu ber a chawi.