FA Cup draw Liverpool-in phuba lakna remchang an nei dawn

English football-a inelna ngaihhlut hlawh FA Cup third round-a intum tur chu Pathianni zan khan tihchian a ni a, Liverpool chuan Premier League-a ti mualphotu Aston Villa an hmachhawn dawn. 

Champion lai Arsenal chuan Premier League club Newcastle United an hmachhawn dawn a, a awlsam lo ang. Manchester United-in Championship club Watford an mikhual ang. 

Chelsea-in League Two club More-cambe an mikhual dawn a, Manchester City leh Birmingham City an intawng ang a, Tottenham Hotspur-in non-league club Marine an hmachhawn dawn thung. 

FA Cup third round hi January 8-11 inkarah khelh a ni dawn a, Premier League leh Championship club-te chuan third round aṭang hian FA Cup inelna hi an hmachhawn ṭan ve chauh a ni. 

Liverpool hian season hmasa khan League Cup quarterfinal-ah Aston Villa an tawng a, hetihlai hi Reds senior team-in Club World Cup an khelh lai a nih avangin Under-23 team-in an hmachhawn. 

Jurgen Klopp pawhin Liverpool a ho thei lo a, 5-0 ngawtin an tlawm. Reds-in Premier League-a vawi hnih an intawnah erawh an hneh ve ve a, an rilru a dam. 

Kum 2020-a her chhuak a, Premier League-ah Villa hian rin loh takin Liverpool hi 7-2 in an sawp. Jurgen Klopp-a naute hliamin a tih buai tak tak hma a ni a, Premier League champion tan mualphona tawp khawk a ni. 

FA Cup-a Villa ber kher an tawng leh tur hi Reds player-te chu an lawm zawk ang tih a chiang a, phuba lak an châk dawn - Villa-in vanneih vanga Liverpool sawp an ni lo, tih lantir an duh bawk ang. 

Premier League hmahruaitu Tottenham Hotspur chuan third round-ah non-league club Marine an hmachhawn dawn a, anni hi English eight division lama inelna hmachhawn lai an ni! Marine boss Neil Young chuan, "Thil awihawm lo tak a ni hial zawk a, kan ṭhat theih dan berin ruahmanna kan siam dawn - Jose hi chuan a team ṭha ber a khelhtir zel a ni," a ti. 

Young hian Spurs a huphurh lo a, an hmachhawn dawn avangin a lawm zawk. Young chuan, "He hmun thleng tur hian match sarihah hnehna kan chang a, Spurs hmachhawn hi kan tan chuan lawmman a ni," a ti a, Jose Mourinho team an hmachhawn tur chu a lawm hle. 

Marine hian preliminary round aṭangin FA Cup hi an khel ṭan a, an zinkawng ngaihtuah chuan an thlen chin hi ropui tak a ni - eight division club zinga FA Cup third round lut thei pahnihna an ni. 

Third round-ah hian non-league club pathum an tling a, Marine chu a hniam ber an ni - Chorley FC chu sixth division club an ni a, fifth division club Stockport County FC leh Boreham Wood an tling ve bawk. 

National League North club Chorley chuan Manchester United legend Wayne Rooney enkawlna hnuaia awm mek Derby County an hmachhawn dawn a, Derby hi Championship-ah an talbuai mek. 

Chorley hian League One club Wigan Athletic leh Peterborough United an lo hneh tawh a, team talbuai tak Derby hi an hlau bik lo ang. Boreham hian Championship club tho Millwall an hmachhawn ang. 

Stockport-in West Ham an hma-chhawn dawn a, Chorley ai chuan an hna a hautak hret - thilmak thlentir a, Premier League club hi barakhaih an tum ang.