Liverpool leh table chung ber chu kawp tura duan

Premier League hmahruaitu Liverpool chu Champions League-ah pawh hmahruaitu an ni zel - Nilaini zan khan Reds hian an mikhual Real Madrid chu 2-0 in an hneh a, match nga an khelh tawhah an chak fai vek!

Liverpool tan Mohamed Salah chuan penalty hlah mah se, Alexis Mac Allister leh Cody Gakpo ten goal khat ve ve an khung a, English club tan Salah-a penalty hlah hian pawi a thlen lo.

Hetihlai hian Real lamah Kylian Mbappe chuan penalty a hlah ve bawk a, Liverpool second choice keeper Caoimhin Kelleher chuan a dansak - hei erawh Real tan a pawi thui a, French striker hian khung ngat se, inkhel thawnthu a danglam mai thei.

Liverpool-in match thum khelh tur la nei mah se, match nga aṭanga point 15 an neih tawh avangin last 16 an lut chiang angin a sawi theih a, Real erawh match ngaah point ruk chiah an la neih avangin tla nghal thei dinhmunah an ding mek.

Hmelma ngamna

Liverpool-in Champions League-a Real Madrid an hmachhawn hnuhnung pariatah chak an nei miah lo a, heng zingah hian Champions League final match hniha an ngam loh chu a tel - Liverpool fan-te rilru na a dam thei lo.

Nilaini zanah an intawng leh ta ngei a, Reds fan-ten an lo nghahhlelh em em chu a thleng a, Real Madrid an ngam. Merseyside club tan Mac Allister chuan minute 52-naah goal hmahruai a khung a, 1-0 a ni.

Real-in Mbappe penalty hmangin chhanlet theihna remchang an nei a, mahse, French striker hian Kelleher a paltlang thei tlat lo - Mbappe-a'n penalty a hlah hian 1-0 a ni a, kum 25 mi striker hi Real tlawm chhanah tam takin an puh a nih pawhin a awm lo hran lo.

Liverpool pawhin 2-0 a an hmahruaina belhchhah theihna remchang an neih hmasak an bawhpelh ve tho a, goal khung ṭhang Mohamed Salah chuan penalty a hlah - hetah hian Liverpool thawnthu erawh a tawp lo.

A hmawr bawkna

Minute 76-naah Reds-in an goal hnihna an khung a, bench aṭanga luhtir Cody Gakpo khung a ni - penalty chawitu Andy Robertson-a'n a tihsual thup nan assist a nei a, a ball cross ṭha tak chu Dutch striker hian goal-ah a lo chantir.

Hun tawp thlengin goal dang a lut tawh lo a, Liverpool an chak. English club khelh danah sawisel tur a awm lo tiin a sawi theih a, chutihrual chuan lawm erawh a kim bik lo.

Trent Alexander-Arnold-a hmun ruak zo taka hnawhkhattu Conor Bradley leh Ibrahima Konate te chu hliam vangin lakchhuah an ngai a, he thu buatsaih a nih lai hian player pahnih dinhmun hi chiang taka sawi theih a la ni rih lo a ni.

Slot chuan, "An hliam dinhmun sawi nan a la hma hret a, an inkhelh theih leh mai ka beisei," a ti. Liverpool hian December 1, Pathianni zanah Manchester City an mikhual zui dawn a, player pahnih dam vat hi Reds tan a pawimawh dawn.

Liverpool lawmna

Reds tan hliam damkawr Trent Alexander-Arnold a inlan thei lo a, a aiah Bradley a lut - kum 21 mi right back hi a khel ṭha takzet. Mbappe dah 'nil' tu tiin a sawi theih a, Mac Allister-a goal khung chu a ke aṭanga chhuak a ni bawk.

Season tawp ruala Anfield-a contract hmang zo tur Arnold-a'n Liverpool contract zawrh a la hnar zel nia sawi a ni a, Real nen sawizawm mek a ni. Arnold hi a ṭang rei viau a nih chuan Liverpool hian an thlem reng a rinawm lo a, Bradley an neih tho avangin an thla a phang lo ang.

Liverpool tan hliam vangin first choice keeper Alisson chawl reng mah se, a awm loh hlanin thachhang dawltu Kelleher a che ṭha a, Reds squad chhahzia pholangtu a ni. Salah-a'n penalty hlah mah se, a hnawksak ngaiin a hnawksak reng a, penalty hlah erawh a ui vawng vawngin a rinawm.

Player mal tin sawi vek sen a ni lo. Liverpool player zingah khel chhia tia sawi tur an awm meuh lo a, an mikhual Real lakah kawng tinrengin an chungnung zawk.

Real talbuaina

Carlo Ancelotti-a'n Liverpool lakah chhuanlam tur a nei. Tlarhmaah player chhuanvawr Vinicius Jr. leh Rodrygo a chhawr thei lo a, Aurelien Tchouameni a inhliam a, Dani Carvajal, Eder Militao leh David Alaba te an la chawl vek bawk.

Right back-ah midfielder Federico Valverde a khel a, Antonio Rudiger kawppui pawh Champions League-a a match hmasa ber kheltu Raul Asencio a ni - heti chung hian Europe-a team 'form' ber tih ngam Liverpool an lenchilh a, an tan a harsa.

Chutihrual chuan Real hi an khel chhe ve hrim hrim bawk. Reds tlarhnung hmaah Mbappe a thamral a, Jude Bellingham che mawi ṭhin mah se danglamna thlen turin a che mawi thei lo a, Anfield-a inkhel en hnai pawl a ni ringawt!

A tawpah chuan chak phu zawk Liverpool-in hnehna an chang a, a chung berah an awm a, Real erawh 24-naah an awm - hei hi playoff khel phak tur chin tana a tawpna ber a ni a, an dinhmun him lohzia hei hian a pholang.

--------------------

Match chuti zatah chuan point chuti zat chu kan hmu ang tih ang zawngin ngaihtuahna ka seng hran lo. Khelh dan phung ka lo neihte a rang thei ang bera tuh ngheh kha ka duh chu a ni mai a, Jurgen-a kalphung leh ka tihdan hi a inzul deuh avangin ka tan chuan a harsa lo hle.
Bul ṭantu player chauh ni loin, bench aṭanga rawn lut thlenga an khel ṭha kha ka lawmna chu a ni. Season ṭan dawn khan tun dinhmuna kan point hmuh tur ang zat hi chhut ta ila, heti zat zat chu kan hmuh ka ring bik lo ang.
- Arne Slot, Liverpool head coach

--------------------

Inkhel a awlsam dawn lo tih hi chu kan hriat sa a ni. Anfield-a inkhelh hi tun dinhmuna Europe-a thil harsa ber a ni hial ang. Liverpool player-te an inman em em a, mahse, penalty hma kha chu kan la ti ṭha viau a, kan talbuai ta a ni.
First half-ah tlarhnung kan veng ṭha a, kha aia counter attacking ti ṭha zawk tur erawh kan ni - Europe-a team ṭha ber lakah kan ti ṭha thawkhat viau e. Liverpool-in chak an phu a, kan theihtawp erawh kan chhuah. League stage hi kan paltlang dawn a, kum dang ang thoin nomawi chawi kan tum ang. Lo thlir reng rawh u, kan paltlang em em ang.
- Carlo Ancelotti, Real Madrid boss