Zanin dar 7:00-ah Aizawl FC Vs Bengaluru: Mizo mipui ṭawiawmna ṭha zawk kan beisei - AFC coach

I League-ah zanin dar 7:00 hian Aizawl FC-in RG Stadium, Mualpuiah kai thar SC Bengaluru an mikhual dawn a, coach Victor Lalbiakmawia chuan Mizo hlanga khel Mizo club ṭawiawm turin Mizo mipui a sawm.

MPL11 champion Aizawl FC hi an match hmasa berah Dempo SC nen goal awm loin an inhnehtawk a, Bengaluru SC lakah chak ngei an tum. Inkhel en man hi Rs 100 chauh a ni a, Dempo an hmachhawn ṭum pawhin entu 1233 anga chhinchhiah a ni.

Dempo khelh ṭum

Aizawl FC-in Dempo an khelh ṭumin an khel chhe lo a, mah se goal hmaa an chance ṭha an hlah avangin goal an khung lo. Tlarhma lam siam ṭhat ngai mah se tlarhnung lam a phui avangin lawmna tur a awm.

Dempo an hmachhawn ṭum hian Samuel Lalmuanpuia leh Laltlanzova te hliam vangin squad-ah an awm lo a; C. Lalmuanpuia leh Lalruatthara te squad-ah awm mah se dam chian loh avangin an la chhawr ngam lo.

Chutihrualin player thar Zothanpuia (Puipuia) leh MPL11 final-a goal awmchhun khungtu Lalawmpuia Sailo te midfield laiah an khel ṭha viau a, MPL11 best player Lalthankhuma (TK-a) erawh a mawhphurhna a san avangin hmasawn hret a mamawh.

Tlarhma lamah Lalhriatpuia'n chance ṭha a hlah hnem a, mual sira awm Augustine Lalrochana leh Lalbiakdika te pawh scoresheet-a awm turin an ṭan leh hret a ṭul ang.

Beiseina thar

Aizawl FC coach Victor Lalbiakmawia chuan, "Kan match hmasa bera khel player tam zawk khan I League-ah tawnhriat an la ngah lo a, Mizo hlanga kan khelh bawk avangin a vawi khatna chu a har ṭhin. Match hnihnaah chuan an theihna angin an khel thei tawh ang," tiin Vanglaini a hrilh.

Mizo club hian season liam taa an player pawimawh an chhuah nual a, chutihrualin captain Lalchhawnkima'n tlarhnungah a la ho thei thung. Mual sira awm Augustine leh BD-a te hian MPL-ah hming an chher a, I League-a an chher chhunzawm theih chuan Aizawl FC an che ṭha ang.

AFC coach Victor chuan sawi chhunzawmin, "Player inhliamte an la dam lo a, starting eleven-ah erawh pahnih khat chu kan thlak turah ka ngai," tiin a sawi.

Dempo an hmachhawn ṭumin Serchhip tlangval Lalrinzuala chu minute 81-naah a lut a, bul ṭan turah a ngaih theih. Rinzuala thlak tur erawh hriatthiam a har a, Aizawl FC-in chak ngei an tum avangin Rinzuala hi tlarhmaah Hriatpuia nen an inkawptir thei bawk.

Bengaluru hi...

SC Bengaluru hi season liam ta I League 2 champion an ni a, ISL club Bengaluru FC nen ngaih pawlh loh tur a ni. Bengaluru hian champion rinkai zinga mi Inter Kashi tan buaina an siam thei a, club budget sang lo mah se dah hniam theih an ni lo.

Bengaluru hian Spanish winger Jordan Lamela chu Inter Kashi aṭangin an la lut a, Real Kashmir aṭanga an lakluh Portuguese player Carlos Lomba pawh zaninah a inlan theih beisei a ni.

Team enkawltu Chinta Chandrashekar Rao hi kum 38 mi chauh a ni a, chutihrualin India ram hmun hrang hrang aṭangin player a hui khawm ṭha. Season liam taa Aizawl FC tana khel Sheikh Sahil pawh a tel.

Bengaluru hian Santosh Trophy leh National Games-a Services champion puitu Shafeel PP an chang thei a, ani hi team chakna thahrui ni thei tura theihna nei a ni. Inter Kashi an hmachhawn ṭumin Shafeel hi right back-ah chhawr a ni a, thil ropui ti lo mah se a hna tur chin a hneh ṭhin hle.