Last 32 khelh zawh a ni dawn

G.I.G Motors MFA All Mizoram Inter Village Football Championship 2024 last 32 chu vawiin hian khelh zawh a ni dawn a, 1st MAP Ground, Armed Vengah match hnih a awm dawn.

Chawhma dar 11:00-ah Aizawl khaw pawn team ṭha Lengpui leh Tuivamit te an inkhel ang a, chawhnu dar 1:00-ah Mamit Joint leh Chhinga Veng te an inkhel zui ang.

Lengpui hian chhiat lai tak tak an nei lo a, chutihrualin tun ṭum erawh ISL leh I League khelh hun lai a nih avangin anṭhat loh ṭum a ni zawk. Coach Lalbiaknia (Valtea) chuan, "Team thar din a ṭul a, player naupang zawk chungah rinna kan nghat. Chhuantea'n min ho thei a, eng team pawh hmachhawn ila, kan theihna zawng zawng kan chhuah dawn," tiin Vanglaini a hrilh.

Rohmingthanga nau Lalchhuanmawia (Chhuantea) hian captain hna a la chelh a, ani baka player langsar chu Chanmari FC tana khel Lalrokima a ni. Rokima hian Chite an hneh ṭumin goal awmchhung a khung. Lengpui khingpui tur Tuivamit hian Sihphir 3-1 in an hneh thei a, penalty shootout hmangin Durtlang North an hneh tawh bawk.

Chhinga Veng leh Mamit te hi inkhel tawk viau tura ngaih an ni. Mizo midfielder ṭha ber zinga chhiar tel tawh tur R. Malsawmtluanga'n Chhinga Veng hi a ho a, chutihrualin champion rinkai erawh an ni pha lo.

Mamit hi joint VC team an ni bawk a, Chhinga Veng hneh thei tur squad an awm. Mizoram forward Lalthanpuia (Tepuia) an chhawr thei tawh dawn a, Sihphir Venghlun striker Tepuia tel lo pawhin New Serchhip 7-0 in an sawp.

Mamit hian midfield-ah Mizoram senior team tana khel tawh midfielder Lalbiakhlua an nei a, tlarhnungah Mizoram junor tema captain Zothansanga (Sangsanga) te an kawl. MPL leh First Division-a a khel an inpawlh ṭhat avangin Chhinga Veng lakah an inringtawk khawp ang.