GIG Motors Inter Village Football : Last 16-ah Sihphir Venghlun leh Tlangnuam

G.I.G Motors MFA All Mizoram Inter Village Football Championship 2024-ah Sihphir Venghlunin 3-0 in Tuithiang an hneh a, Tlangnuamin player 10-a khel chungin Tlangmawi 4-3 in an hneh bawk. Sihphir Venghlun leh Tlangnuam hi last 16-ah an inhmachhawn ang.

Inter Village last 16 hi December 2, Thawhṭanni aṭangin khelh ṭan a ni dawn a, quarterfinal hi December 4-6, 2024-ah khelh a ni ang. Quarterfinal aṭangin RG Stadium-ah vek khelh a ni ang a, semifinal hi December 9, Thawhṭannia khelh tur niin December 12, Ningani zan dar 7:30-ah final khelh tur a ni.

LPS Cup champion

Sihphir Venghlunin Tuithiang lakah LPS Cup champion danglamna a lantir a, Lalfakzuala goal hnih leh Lalfamkima te goal hmangin 3-0 in hnehna an chang.

1st Bn MAP Ground-ah Tuithiangin bul an ṭan chhe lo a, inkhel ṭantirh lamah ball pawh an chang tam zawk. Mahse, minute 14-naah dinglam aṭanga Lalrintluanga ball vawrh luh chu box chhung chiahah Lalfakzuala'n chang fuhin Tuithiang player a pet per hnuah goal kilah tak a lut.

Team pahnihin chance an inneih chhawk a, Tuithiang keeper Zosangliana a che ṭha. Chutihrualin Sihphir Venghlun keeper Lalrinmawia pawhin hna a nei ve reng.

MPL-a Project Veng leh FC Bethlehem tana khel tawh Lalfamkima'n chance ṭha a insiam a, hnai tak aṭangin crossbar a pet per. Goal hmahruai khungtu Faktea a vannei zui a, minute 44-naah box pawn aṭangin Tuithiang defender pet perin mawi zetin goal-ah kul lut.

Second half-ah Tuithiangin goal khung tumin an nawr na hret a, goal khung theihna remchang pawh an nei. Hmangaihkima freekick pet chu keeper Rinmawia'n a dansak a, Sihphir Venghlun an him zel.

Tuithiang lamin goal chance ṭha bik an insiam thei lo a, Sihphir Venghlun erawh goal khungna remchang an nei. FK-a'n hnai tak aṭangin a pet over a, mahse a hlah reng bik lo. Minute 76-naah FK-a'n defender a pet per hnuah a per leh chu kawh zetin a pet goal a, keeper Zosanga tan dan ngaihna a awm lo. Tuithiangin goal thum an chhuah tawh avangin beisei tur an nei tawh lo a, Sihphir Venghlun 3-0 in an chak.

Tlangnuam nge nge

Tlangnuam leh Tlangmawi inkhel a nung ṭha a, a tawpah CYMA Football 2023 finalist danglamna langin 4-3 in hnehna an chang. Tlangmawi hian hma hruai zel mah se Tlangnuamin an sut zel thei a, player 10-a khel chungin hnehna an chang.

Tlangmawiin theihna an nei sang tih a lang a, minute 15-naah Samuel Lalruatbika'n mawi zetin box pawn aṭangin a volley goal - a class takzet. Tlangnuam lamin freekick aṭangin siphurh an sut a, minute 26-naah M Lalpektluanga 'n box pawn aṭangin goal kilah tak a dah.

Team nem zawka ngaih Tlangmawi bawkin hma an hruai a, Malsawmtluanga'n box pawnah ball changin Tlangnuam defender pahnih paltlangin minute 29-naah hmahruaina goal a khung.

Tlangmawi midfielder Michael Lalbiaksanga'n Tlangnuam tlarhnung a rum ṭhaih a, Reuben Lalhruaitluanga a insum zo lo. Ruben hian Michael-a ball khalh lai a chhuhsak theih loh avangin a tlawh bakah a pet lui a, minute 33-naah hnawhchhuah a ni.

Mahse, player 10-a khel Tlangnuamin freekick an hmang ṭangkai a, M. Peka freekick chu Chanmari FC forward Vincent Lalduhawma'n minute 40-naah a tauh lut. Tlangmawiin an tamna a hmang ṭangkai leh tho a, first half injury time-ah Lalrohlua'n box chhungah rilru fim neiin ṭha zetin a pet goal.

Tlangnuamin half time a hmang ṭangkai a, coach Francis Lalpekhlua'n player-te a fuih ṭha tih a lang. Minute 55-naah Vincent Lalduhawma thawhrah chu M. Peka'n sengin siphurh sutna goal a khung.

Minut khat hnuah Tlangnuamin hma an hruai lehnghal a, vei lam aṭanga cross ball ṭha chu Vanlaldinpuia'n a pet goal. Player 10-a khel Tlangnuamin hma an hruai hnuah goal an venghim ṭha a, Tlangmawi erawh hun rei lote chhung an mutthluk tuarin Inter Village Football zin kawng a tawp.