Aston Villa an chak thei lo

Aston Villa chuan inelna hrang hrangah match sarih zet chu a zawnin hnehna an chang zo ta lo - Nilaini zan khan Champions League-ah Juventus an mikhual a, Italian club nen hian 0-0 in an inhnehtawk.

Villa tan Morgan Rogers chuan hun pek belhah chakna goal a khung emaw a ti hman a, mahse, video assistant referee hmanga ennawn a nih hnuah, goal a luh hmain Diego Carlos chu Juve goalkeeper Michele di Gregorio lakah a foul niin a lang a, goal hi pawm a ni ta lo.

Referee thutluknaah Unai Emery a lawm lo a, Villa boss chuan, "England-ah chuan ni se, goal-ah pawm a ni ang. English referee ho chuan tiang kha foul an ti ngai lo a, Europe-ah chuan a dang deuh a ni," a ti.

Villa hian match nga aṭangin point 10 an nei a, an hmabakah RB Leipzig (away), AS Monaco (away) leh Celtic (home) an awm avangin last 16 luhna chance a la sang a, Juve hian point riat an nei thung.

Italian club hian UCL-a an match hmasa pohnihah hnehna chang mah se, a hnu match thumah chak an nei tawh lo a, vawi khat tlawmin, vawi hnih draw an nei. Hmabakah Manchester City (home), Club Brugge (away) leh Benfica (home) te an la awm.