Season tawp hmaa lo kir beisei Rodri

Manchester City midfielder Rodri chuan tun season tawp hma ngeiin a inkhelh ve leh hman a beisei tih a sawi - a lo kir hun tur tak erawh sawi theih a la ni lo thung.

September thlaa khan Man City leh Arsenal an inkhel a, hemi ṭum hian Rodri hi a khup a hliam. Pep Guardiola chuan a player pawimawh hi tun season chhung an chawr thei dawn tawh lo tih a sawi tawh a ni.

Spanish midfielder Rodri chuan, "Tun season atan hian ka la beidawng lo, ka chhut dan chuan thla ruk emaw thla sarih chhung emaw ka chawl ang, tun season a tawp hma ngeiin inkhelh ve leh ka tum.

"Hliam vanga chawlh chu a hrehawm a, chutihrualin kan duhthlanna a nih bik loh avangin lungawi taka pawm a ngai. A hma thei ang bera inkhelh leh ka duh, mahse hmanhmawh lutuk vanga tihsual neih erawh ka duh lo.

"A tir thla khat leh a chanve chhung kha chu a na khawp mai a, kal sawn ringawt pawh a harsa. Tunah erawh zawimuangin hma ka sawn ve zel a, ka rin aiin ka dam chak bawk," tiin a sawi.

Rodri awm loh hlanin Manchester City an che fuh hleithei rih lo - tun kar tawp hian Liverpool nen Premier League an khel dawn a, an nomawi kawl lai chhuhsak tumtu nen an intawn dawn avangin inkhel hi a pawimawh.

England rana football inelna sang ber Premier League season kal lai hi May 25-ah a zo ang a, league zawh aṭanga ni riat hnuah FA Cup final an khel leh bawk ang, chumi hnuah team 32 telna Club World Cup khelh tur a awm dawn bawk a ni.