Rawlthar duhawm ber Yamal

Barcelona forward Lamine Yamal hnenah 2024 Golden Boy award hlan a ni. Catalan club mai bakah an ram Spain tan a hlawhtlinna chuan chawimawhna a hlawh chhuak zel a ni.

Golden Boy award hi Italian chanchinbu pakhat Tuttosport thlan a ni a, kum 21 hnuai lam player ṭhate zingah award dawng tur hi chanchinbu miten an thlang ṭhin a, kum 2003 aṭanga khan an sem ṭan a ni.

Yamal hi kum 17 mi chauh a la ni a, a kum la naupang hle mah se season hmasa khan Barcelona tan rinrawl a ni phak tawh. Nipui lai khan an ram Spain chu European Chamspionship-ah hlawhtlinna a chanpui bawk.

Yamal hian a player ngaihsan Lionel Messi hnung a zui mek - Messi hian kum 2005 khan he chawimawina hi a lo dawng tawh. Barcelona player zingah - Gavi leh Pedri te pawhin tun hnai khan award hi an lo dawng tawh bawk.

La Masia chhuak Yamal hian tun season pawh a hmang ṭha leh hle. La Liga match 12 an khelh aṭangin goal nga a khung tawh a, a team hi league hmahruaitu a nih pui mek, champion lai Real Madrid chungah an awm.

Golden Boy award hi Cristiano Ronaldo chuan a dawng ve lo! Kum 2004 khan Ronaldo hi pahnihna a ni a, award dawng tur hian Wayne Rooney a tluk lo a ni.