Sunil Chhetri a la tar lo

Kum 40 ni tawh mah se, Sunil Chhetri a la tar lo - Nilaini zan khan Indian Super League inkhelah Bengaluru a chhan chhuak a, hun tawp hnaih lamah goal hnih thawk chhuakin, kai thar Mohammedan SC lakah a team chu 2-1 in a chakpui.

I League champion Mohammedan hian minute riatna lekah Cesar Manzoki hmangin goal hmahruai an khung a, rei tak chhung goal dang a luh loh avangin Bengaluru lakah chak tura rinna a lian hman hle.

Mahse, Mohammedan an hmachhawn hmaa match khat chiah la tlawm Bengaluru-in tlawm an lo tum reng reng lo. Hun tawp nan minute sarih chiah a awm tawh tihah Bengaluru-in penalty an hlawh chhuak a, Chhetri chuan goal-ah a chantir - ISL khel tawh club 15 laka goal khung vek hmasa ber record a siam.

India international hlui hian a la duhtawk lo cheu - hun pek belh minute kuanaa Lalremtluanga Fanai ball cross chu a tauh lut a, point an insem dawn emaw tih hnuah Bengaluru an chak daih!

Chhetri goal tauh luh hian a luh hmain, season hmasa lawka Ligue 1 club Clermont tana khel, defender Florent Ogier-a lu a per a, hei vang hian 'own goal' angin record a ni.

Nilaini zan inkhelah hian Mohammedan tan defender Zodingliana Tochhawng, Vanlalzuidika Chhakchhuak, Lalrinfela Khiangte leh Lalremsanga Fanai ten inkhel bul an ṭan a, Bengaluru-a Mizo awmchhun Lalremtluanga Fanaiin bul ṭan lo mah se, bench aṭanga lutin, a tawpa an chakna goal thawk chhuaktu a ni.