Chinese Grand Prix neih hun an sawn

China rama hri leng mek vangin infiamna khawvel pawh a buai a, car intlansiakna sang ber Formula 1 calendar pawh tih danglam a ngai dawn. April 19-a neih tur Chinese Grand Prix chu a hun pangngaiah neih theih a ni dawn lo.

Hri leng 'coronavirus' hi mi 40,000 chuangin an vei tih hmuhchhauh a ni tawh, nimin tlai thleng khan BBC Sports lamin a tarlan dan chuan mi 1,016-in an thih phah tawh.

Inelna neih hun tur sawn mah se Shanghai khawpuia F1 an tlan hun tur hi tihchian a la ni lo, hun rei lote hnuah tih chhuah tura ngaih a ni. Formula 1 managing director Ross Brawn chuan tun thlatir khan a hun pangngaiah an neih theih dawn loh chuan an sawn mai tur thu a lo sawi tawh a ni.