Semifinal khel tur a hriat kim ta

Zudio LPS Pro Fight 2024 neih laiah Nilaini zan khan quarterfinal khelh zawh a ni a, semifinal khel tur a hriat kim. November 29-30 hian LPS Arena, Falkland Vengah final khel tur zawn chhunzawm leh nghal a ni ang.

Semifinal aṭang hian round li zel an inhek dawn tawh a ni. Semifinal-a chak lo in lawmman Rs 8,000 ṭheuh an dawng ang a, a hmuna inhnek enna ticket Rs 100 a ni tawh dawn a ni.

Bantamweight: Boxer pahnih an inven tawn avangin inhnek a nung tawk mai lo, a tawp lamah erawh Sebastian VL Rinnunga chu chak duha tuihal zawk a ni tih a lang. Round hnuhnung berah Rinnunga'n ṭan hmun a siam ṭha a, langsar taka a hnek fuh zawn rualin thiamna nei zawk a ni tih a lantir a, nikum ang bawkin Hmangaihenliana erawh quarterfinal-ah a tla.

Middleweight: C. Lalduhawma tan hna harsa lutuk a la awm rih lo. Kum 2019 middleweight champion Duhawma hian Vanlalbiakhluna lakah round tin la vekin inhnek a thunun. Bethlehem Vengthlang boxer hi Inrinni zanah thahrui nei leh nghet tha tak Seling boxer Zoremsiama nen final luh an inchuh dawn a ni.

Lightweight: C. Lalhruaitluanga'n champion ngei a tum a ni tih a takin a lantir zel. Cherhlun tlangval Hruaia'n awlsam lo takin Lalrinawma lakah hnehna a chang. A tir lamah che fuh tawk lo mah se round hnihna aṭangin tlak fual nei lo in 29-28, 29-28, 28-29-in a chak - Inrinni zan semifinal-ah Bungkawn boxer Vanlalnghaka nen an inhmachhawn ang.

Welterweight: National Games silver medal awrh tawh Lallawmawma kawng a awlsam zel a, thiamna leh theihna kawng hrang hrangah Lalhriatrenga awpbet tluanin chiang takin semifinal a lut. Pro Fight-a a tel hmasak berah amatuer boxing-a insawrbing ṭhin Lawma'n a bitumte a hnek hneh thei hle a ni, semifinal-ah rin hlawh ni chungin Chawnpui rawlthar Lalnunsanga hmaah a inlan zui leh dawn a ni.

Flyweight: Kum 2022 bantam champion Lalrinngheta'n thiamna hmangin tharum ngah Biaklawmthanga lakah inhnek a thunun a, ṭha taka inveng chungin dik leh rang tak takin a hnek a, chiang takin round tinah a chak. Weight hrang pahniha champion a tumna kawng erawh a awlsam zui dawn lo a, Inrinni zanah Melthum beisei Emmanuel Vanlalthlengliana nen an inhmachhawn dawn a ni.

Flyweight: Vanlalthlengliana'n tun hnai thla li chhunga a vawi hnih nan Benjamin Lalrindika a hneh. Tun ṭum Pro Fight hma hian July thla tawp lam khan LPS Fight Night-ah a lo hneh tawh bawk. Nilaini zan inhnekah hian judge pathumin 30-26 vekin an chaktir a ni. Minute khat bak an la innuai hman lo tihin Thlenga'n vawi thum a hnek zawn a, a ding lamin a bekah chiang takin a vai tlu a ni.